Oʻzbekiston Respublikasi Ichki ishlar vaziri, general-leytenant Aziz Anvarovich Tashpulatovning Yangi yil munosabati bilan bayram tabrigi
2026-01-01 00:00:00 / Yangiliklar
Ichki ishlar organlari xodimlari va harbiy xizmatchilarini, taʼlim muassasalari professor-oʻqituvchilarini, tinglovchi-kursantlarini, tizimda koʻp yillar xizmat qilgan qadrli faxriylarimizni hamda el-yurt osoyishtaligini himoya qilib, xizmat burchini bajarish chogʻida halok boʻlgan xodimlarimizning oila aʼzolarini hamda barcha yurtdoshlarimizni Yangi yil bayrami bilan samimiy muborakbod etaman.
Yakunlanayotgan yil mamlakatimiz hayotida muhim islohotlar, tinchlik va barqarorlikni taʼminlash, xalqimiz farovonligini oshirish yoʻlida qilingan ezgu va samarali ishlar bilan yodda qoldi. Yangi yil esa bizni yangi marralar va ulkan rejalar sari chorlamoqda. Buni kuni kecha muhtaram Prezidentimiz Shavkat Miromonovich Mirziyoyevning Oliy Majlisga va xalqimizga qilgan murojaatlarini tinglab yana bir bor his etdik.
Davlatimiz rahbari tashabbusi bilan 2026-yilning “Mahallani rivojlantirish va jamiyatni yuksaltirish yili” deb eʼlon qilingani barchamiz uchun katta ahamiyatga ega. Bu tashabbus mahalla institutini yanada mustahkamlash, jamiyatda qonun ustuvorligini taʼminlash, aholining tinch va osoyishta hayotini kafolatlashga xizmat qiladi. Bu esa barcha soha vakillari singari xalqimiz bilan hamisha hamnafas boʻlgan xodimlar zimmasiga ulkan masʼuliyat yuklaydi.
Bu talab va vazifalardan kelib chiqib, ichki ishlar organlari xodimlari 2026-yilda ham xalqimizga sidqidildan xizmat qilish, el-yurtimiz osoyishtaligini, jamoat xavfsizligi va fuqarolarimiz xotirjamligini taʼminlash yoʻlida bor kuch-gʻayratlarini safarbar etadilar.
Yangi yil har bir xonadonga tinchlik-omonlik, sihat-salomatlik, fayzu baraka va farovonlik olib kelsin. Koʻnglingizdagi barcha ezgu niyatlaringiz roʻyobga chiqsin!
Yangi 2026-yil barchangizga muborak boʻlsin!
Aziz Tashpulatov,
Oʻzbekiston Respublikasi Ichki ishlar vaziri,
general-leytenant