Sirdaryo tumanida yoshlar bilan manzilli ishlash masalalari yuzasidan oʻrganish va uchrashuvlar oʻtkazildi
2025-12-30 11:25:00 / Yangiliklar
Yoshlar har bir mamlakatning ertangi kuni, eng katta ishonchi va mustahkam poydevori hisoblanadi. Shu bois bugungi kunda rahbar kadrlarga yoshlarni biriktirish amaliyoti izchil yoʻlga qoʻyilib, ayniqsa jinoyat sodir etishga moyil, xulq-atvorida salbiy jihatlar kuzatilgan yoshlar bilan manzilli ishlashga alohida eʼtibor qaratilmoqda.
Ana shu maqsadda Sirdaryo viloyati Ichki ishlar boshqarmasi boshligʻi polkovnik Farux Xaydarov Sirdaryo tumanida boʻlib, oʻziga biriktirilgan yoshlar bilan bevosita uchrashuvlar oʻtkazdi. Oʻrganishlar jarayonida yoshlarning oilaviy holati, ijtimoiy muammolari, sogʻligʻi, taʼlim olishi, bandligi va kelajak rejalari atroflicha tahlil qilindi. Shuningdek, ularning murojaatlari tinglanib, har bir masala boʻyicha aniq yechimlar belgilandi.
Xususan masʼullarga ushbu yoshlarning doimiy bandligini taʼminlash, kasb-hunarga yoʻnaltirish, daromad manbasini yaratish, shuningdek sogʻligi bilan bogʻliq muammolarini ijobiy hal etish yuzasidan amaliy yordam koʻrsatish boʻyicha tegishli topshiriqlar berildi. Bu kabi oʻrganishlar, ichki ishlar organlariga biriktirilgan yoshlar bilan manzilli uchrashuv va oʻrganishlar hududlarda davom etmoqda
Sirdaryo viloyati IIB Axborot xizmati