O‘zbеkiston Rеspublikаsi Ichki ishlаr vаzirligi

Soʻnggi yillarda mamlakatimizda sogʻlom turmush tarzini qaror toptirish, yoshlarni sportga keng jalb etish va barcha sport turlarini, jumladan aralash jang sanʼatlarini rivojlantirish borasida izchil va keng koʻlamli ishlar amalga oshirilmoqda. Ayniqsa, ushbu sport turining ommaviyligini oshirish, uni zamonaviy talablar asosida rivojlantirishga alohida eʼtibor qaratilmoqda.

Joriy yilning oktyabr oyidan boshlab Oʻzbekiston aralash jang sanʼatlari assotsiatsiyasiga bevosita Ichki ishlar vaziri rahbarlik qila boshladi. Bu esa mazkur sport turini yanada qoʻllab-quvvatlash, uning nufuzini oshirish va professional darajada rivojlantirishga xizmat qilmoqda.

Shu yoʻnalishdagi muhim tadbirlardan biri sifatida Samarqand shahrida aralash jang sanʼatlari boʻyicha “Viloyat Ichki ishlar boshqarmasi boshligʻi kubogi” musobaqasining oʻtkazilishi ahamiyatli voqea boʻldi. Mazkur musobaqa ushbu sport turini hududlarda yanada ommalashtirish, iqtidorli sportchilarni kashf etish va ularning mahoratlarini oshirishga xizmat qildi.

Musobaqaning tantanali ochilish marosimida Samarqand viloyati Ichki ishlar boshqarmasi boshligʻi, general-mayor Toxir Aripov ishtirok etib, barcha qatnashchilarga omad va zafarlar tiladi. Shuningdek, sport nafaqat jismoniy baquvvatlik, balki doʻstlik, hamjihatlik, intizom va vatanparvarlik ramzi ekanligini alohida taʼkidlab oʻtdi.

Bellashuvlar davomida eng mohir sportchilar 5 ta vazn toifasida oʻzaro kuch sinashdilar. Janglar yuqori saviyada, doʻstona muhitda, halollik va shaffoflik tamoyillari asosida tashkil etildi.

Musobaqa yakunida eng mahoratli sportchilar gʻoliblikni qoʻlga kiritib, viloyat Ichki ishlar boshqarmasi rahbariyati tomonidan munosib ravishda taqdirlandi. Mazkur tadbir aralash jang sanʼatlarini rivojlantirish, yoshlarni sportga keng jalb etish va sogʻlom avlodni tarbiyalash yoʻlida navbatdagi muhim qadam boʻldi.

Samarqand viloyati IIB Axborot xizmati