O‘zbеkiston Rеspublikаsi Ichki ishlаr vаzirligi

Joriy yilning 28-dekabr kuni Xorazm viloyati Ichki ishlar boshqarmasi boshligʻi, polkovnik Abdumajid Shermuxamedov tomonidan fuqarolarning murojaatlarini joyida oʻrganish, ularni qiynayotgan muammolarga oʻz vaqtida va qonuniy yechim topish, shuningdek aholi bilan ochiq va samarali muloqotni yoʻlga qoʻyish maqsadida Xiva shahrida joylashgan Xavfsiz turizmni taʼminlash boshqarmasi binosida navbatdagi sayyor qabul tashkil etildi.

Sayyor qabul davomida fuqarolar tomonidan ichki ishlar organlari faoliyatiga bevosita daxldor boʻlgan, shuningdek ijtimoiy, huquqiy, maʼmuriy va mehnat munosabatlariga oid masalalar yuzasidan bir qator murojaatlar bildirildi. Xususan, jinoyat ishlarini koʻrib chiqishdagi ayrim holatlar, fuqarolik-huquqiy nizolar, mehnat munosabatlarida yuzaga kelayotgan muammolar, jamoat tartibini taʼminlash, profilaktika inspektorlari faoliyatini takomillashtirish masalalari fuqarolar tomonidan keng koʻtarildi.

Xorazm viloyati IIB boshligʻi har bir murojaatni alohida eʼtibor bilan tinglab, fuqarolarning murojaatlariga nisbatan xolis va masʼuliyatli yondashuvni taʼminladi. Qator masalalar boʻyicha murojaatchilarga joyida huquqiy tushuntirishlar berildi, ayrim muammolar esa tegishli xizmat va boʻlinmalar ishtirokida bevosita hal etilishi belgilandi. Qoʻshimcha oʻrganish va amaliy chora koʻrishni talab etgan murojaatlar yuzasidan masʼul rahbar va xodimlarga aniq vazifalar yuklatilib, ularning ijrosi qatʼiy nazoratga olindi.

Shu bilan birga, sayyor qabul jarayonida hududdagi ijtimoiy muhit, aholining turmush tarzi, jamoat xavfsizligini taʼminlash hamda huquqbuzarliklarning barvaqt oldini olish borasida amalga oshirilayotgan profilaktik tadbirlar holati ham atroflicha muhokama qilindi. Bu borada tegishli xizmatlar oldiga profilaktika ishlarini yanada kuchaytirish, fuqarolar bilan doimiy muloqotni yoʻlga qoʻyish boʻyicha qator vazifalar qoʻyildi.

Taʼkidlash joizki, ichki ishlar organlari tomonidan aholi murojaatlari bilan ishlash, fuqarolar muammolarini joyida hal etish, ochiqlik va shaffoflikni taʼminlash davlat siyosati darajasida ustuvor vazifalardan biri hisoblanadi. Shu kabi sayyor qabullar esa aholining davlat organlariga boʻlgan ishonchini mustahkamlash, muammolarni oʻz vaqtida bartaraf etish hamda jinoyatchilikka qarshi kurash va profilaktika ishlari samaradorligini oshirishga xizmat qiladi.

Mazkur sayyor qabul fuqarolarga amaliy yordam koʻrsatish, murojaatlarni tezkor va sifatli hal etish, shuningdek aholi va ichki ishlar organlari oʻrtasidagi oʻzaro hamkorlikni yangi bosqichga olib chiqishda muhim ahamiyat kasb etdi.

Xorazm viloyati IIB Axborot xizmati