Andijon viloyatida istiqomat qiluvchi 39 nafar afv etilgan shaxslar bilan uchrashuv oʻtkazildi
2025-12-26 09:50:00 / Yangiliklar
Oʻzbekiston Respublikasi Prezidenti Shavkat Mirziyoyevning Oʻzbekiston Respublikasi Konstitutsiyasi qabul qilinganligining 33-yilligi munosabati bilan davlatimiz tomonidan olib borilayotgan insonparvarlik siyosatining amaliy tasdigʻi sifatida “Jazo muddatini oʻtayotgan, qilmishiga chin koʻngildan pushaymon boʻlgan va tuzalish yoʻliga qatʼiy oʻtgan bir guruh shaxslarni afv etish toʻgʻrisida”gi Farmoniga asosan afv etilgan, Andijon viloyatida istiqomat qiluvchi 39 nafar shaxs bilan viloyat IIB boshligʻi Sanjar Djabarov ishtirokida uchrashuv oʻtkazildi.
Mazkur tadbirga afv etilgan shaxslarni ijtimoiy hayotga moslashtirish, ularni bandligini taʼminlash va boshqa masalalardagi muammolarini hal etish maqsadida mutasaddi hamkor tashkilot masʼullari ham taklif etildi.
Uchrashuv davomida davlatimiz rahbari tomonidan olib borilayotgan insonparvarlik siyosati, afv institutining mazmun-mohiyati va uning jamiyatda adolat hamda bagʻrikenglikni qaror toptirishdagi ahamiyati alohida taʼkidlandi.
Afv etilgan shaxslarga qonun talablariga qatʼiy amal qilish, takroriy huquqbuzarliklarga yoʻl qoʻymaslik, mehnat faoliyati bilan shugʻullanib, jamiyatda oʻz oʻrnini topish zarurligi haqida tushunchalar berildi.
Shuningdek, uchrashuv jarayonida ishtirokchilarning murojaatlari tinglanib, ish bilan taʼminlash, kasb-hunarga yoʻnaltirish, ijtimoiy qoʻllab-quvvatlash hamda sogʻliqni saqlash masalalari boʻyicha mutasaddi tashkilotlar bilan hamkorlikda amaliy chora-tadbirlar belgilab olindi.
Tadbir yakunida afv etilgan shaxslarning qonuniy hayot tarziga qaytishi, jamiyatda munosib oʻrin egallashi va barqaror turmush kechirishini taʼminlash barcha mutasaddi idoralarning ustuvor vazifasi ekanligi qayd etildi.
Andijon viloyati IIB Axborot xizmati