Surxondaryo viloyati ichki ishlar boshqarmasida yosh xodimlar ota-onalari bilan uchrashuv oʻtkazildi
2025-12-25 11:35:00 / Yangiliklar
Surxondaryo viloyati Ichki ishlar boshqarmasida Oʻzbekiston Respublikasi Ichki ishlar vazirligi Malaka oshirish institutining Boshlangʻich kasbiy tayyorgarlik kursini muvaffaqiyatli tamomlab kelgan yosh xodimlar hamda ularning ota-onalari bilan uchrashuv boʻlib oʻtdi.
Mazkur kursni surxondaryolik jami 59 nafar xodim tamomlab, ichki ishlar organlari xizmatiga qabul qilindi. Ulardan 21 nafari ofitserlik, 38 nafari safdorlik lavozimlariga tayinlanishi belgilangan.
Uchrashuvda Surxondaryo viloyati IIB boshligʻi oʻrinbosari podpolkovnik Zavqiddin Xoʻjanov hamda IIV Shaxsiy xavfsizlik bosh boshqarmasi Surxondaryo viloyati boʻyicha boshqarmasi boshligʻi podpolkovnik Sodiqjon Safarovlar ishtirok etdi.
Taʼkidlanganidek, boshlangʻich kasbiy tayyorgarlik kursini tamomlagan xodimlar tegishli buyruqlar asosida lavozimlarga tayinlanadi hamda ularga ichki ishlar organlarida kamida besh yil xizmat stajiga ega boʻlgan tajribali xodimlar murabbiy sifatida biriktiriladi. Murabbiylik tizimi yosh xodimlarning xizmatga moslashuvi va kasbiy shakllanishini taʼminlashga qaratilgan.
Shuningdek, uchrashuv davomida ichki ishlar organlarida xizmat qilish shartlari, oylik ish haqi, xizmat stajiga qarab beriladigan ustamalar, attestatsiya tartibi hamda xodimlar va ularning oila aʼzolari uchun belgilangan ijtimoiy imtiyozlar haqida ham maʼlumotlar berildi.
Uchrashuv ochiq muloqot tarzida oʻtib, yosh xodimlarning kelgusi xizmat faoliyatida masʼuliyat va kasbiy sadoqatni yanada oshirishga xizmat qildi.
Surxondaryo viloyati IIB Axborot xizmati