IIV akademiyasida dual taʼlimning keng joriy qilingani ijobiy samara bermoqda
2025-12-25 11:30:00 / Yangiliklar
Yangi tizim asosida Toshkent shahridagi ichki ishlar organlari bilan hamkorlikning yoʻlga qoʻyilgani kursantlarning nazariy bilimini amaliy koʻnikmalar yordamida mustahkamlashga xizmat qilmoqda. Akademiya boshligʻi amaliyot jarayonlari bilan tanishish maqsadida Olmazor tumani Ichki ishlar organlari faoliyatini muvofiqlashtirish boshqarmasida boʻldi.
Hozirda mazkur tumanda kunduzgi taʼlimning 2 va 3-oʻquv kursidan 150 nafarga yaqin kursant tegishli mutaxassislik boʻyicha amaliyot oʻtamoqda. Ularga tajribali murabbiylar biriktirilgan boʻlib, mashgʻulotlar paytida kasbiy bilimlarni amaliyotda qoʻllash koʻnikmalarini shakllantirishga alohida eʼtibor qaratilmoqda.
Maʼlumki, dual taʼlimning asosiy maqsadi nazariya va amaliyotni uzviy holda tashkil etish sanaladi. Akademiyada yoʻlga qoʻyilgan tizimning oʻziga xos xususiyatlaridan biri shundaki, bunda kursantlar amaliyot bilan birga, kasbiy moslashish jarayonlarini ham oʻtamoqda. Bu esa vaqtni samarali taqsimlash, yuklatilgan vazifalarni oʻz vaqtida bajarish, nostandart vaziyatlarda oʻzini oʻzi boshqarish, toʻgʻri qaror qabul qilish, ruhiy barqarorlikni namoyon etish, muloqotga kirishuvchanlik kabi omillarda namoyon boʻlmoqda.
Tanishuv chogʻida akademiya boshligʻi sohaviy xizmat rahbarlari bilan suhbatlashib, amaliyotning qay tarzda tashkil etilayotgani, “murabbiy – xodim yordamchisi” mexanizmining samaradorligi, kursantlarga yaratilgan sharoitlar bilan qiziqdi. Masʼullarga tizim imkoniyatlarini oshirish yuzasidan tavsiyalar berdi.
Shuningdek muloqot davomida kriminogen vaziyat bilan bogʻliq masalalar ham muhokama qilindi. Jamoat tartibini saqlashga jalb qilinayotgan xodim va kursantlar xizmatni masʼuliyat bilan oʻtashi, tizim obroʻyiga salbiy taʼsir koʻrsatadigan holatlar va huquqbuzarliklarning barvaqt oldini olish choralarini koʻrishi, xizmat intizomiga qatʼiy rioya qilishi zarurligini taʼkidladi.
Shu kuni dual taʼlim asosida kadrlar tayyorlash sifatini oshirishga qaratilgan muhim vazifalar belgilab olindi.
IIV akademiyasi Axborot xizmati