O‘zbеkiston Rеspublikаsi Ichki ishlаr vаzirligi

Oʻzbekiston Respublikasi IIVning 2025-yil 10-noyabr kunidagi 416-sonli “Respublikada ob-havoning keskin pasayishi, noqulay ob-havo sharoiti natijasida tabiiy gaz, ichimlik suvi va energetika sohalaridagi uzilishlar borasida eʼtirozlar ortib borayotganligi sababli jamoat tartibini saqlash va fuqarolar xavfsizligini taʼminlash toʻgʻrisida”gi farmoyishi ijrosini taʼminlash hamda hududlarda Yongʻin xavfsizligi qoidalariga rioya etilishi, har xil koʻngilsiz holatlarning oldini olish maqsadida, viloyat IIB boshligʻi polkovnik Timur Ismailov tomonidan viloyat hududida yongʻin xavfsizligi, ekologik muhitni yaxshilash, qish mavsumini betalafot oʻtkazish, Yangi yil bayramiga tayyorgarlik koʻrish, Yangi yil archasi oʻrnatilgan hududlarda xavfsizlik borasida amalga oshirilgan ishlar holati oʻrganildi.

Dastlab, Termiz tumanidagi “Yangiobod” mahallasi “Yangi Oʻzbekiston” massivida oʻrnatilgan Yangi yil archasi oldida viloyat hokimligi, barcha huquq-tartibot organlari, davlat va jamoat tashkilotlari rahbarlari ishtirokida tadbir oʻtkazildi. Shuningdek, viloyat huquq-tartibot idoralari rahbarlarining oʻrinbosarlari, sohaviy xizmat boshliqlari hamda shahar-tuman studiyalaridan mahalliy hokimliklar va hududiy huquq-tartibot idoralari rahbarlari hamda tungi xizmatga jalb etilgan xodimlarga Oʻzbekiston Respublikasi ichki ishlar vazirining 2025-yil 7-dekabr kunidagi 442-sonli farmoyishiga muvofiq belgilangan vazifalar yetkazildi. Yangi yil bayram tadbirlari davrida jamoat tartibini saqlash va fuqarolar xavfsizligini taʼminlash yuzasidan onlayn tarzda yoʻriqnoma oʻtkazildi.

Oʻrganishning keyingi manzili Termiz shahri “Kattabogʻ” mahallasi hududida joylashgan “102” xizmati boʻldi. U yerda tungi xizmatga jalb etilgan xodimlarga yoʻriqnoma oʻtkazilib, xizmat uchun yaratilgan shart-sharoitlar oʻrganildi. Shuningdek, “Yashil dunyo” savdo majmuasi, “Beksaroy” koʻp qavatli uylar yonida oʻrnatiladigan Yangi yil archasi hamda bayram tadbirlari oʻtkaziladigan hududlarda xavfsizlik choralari koʻzdan kechirildi.

Shundan soʻng “Oʻzbekiston” mahallasida joylashgan “Surxondaryo viloyat issiqlik taʼminoti” MCHJga qarashli RK–6 markaziy qozonxonasi faoliyati bilan tanishilib, uning texnik imkoniyatlari oʻrganildi.

Bundan tashqari, “Alpomish” mahallasi hududida joylashgan Alisher Navoiy monumenti hamda “Bogʻishamol” mahallasidagi koʻp qavatli uylar oldida oʻrnatilgan Yangi yil archalari atrofida xizmat olib borayotgan ichki ishlar va huquqni muhofaza qilish organlari xodimlarining xizmat faoliyati oʻrganildi. Aniqlangan kamchiliklarni bartaraf etish yuzasidan tegishli tushuntirishlar berildi.

Oʻrganishlar yakunida Prezidentimizning PQ–1-sonli qarori va PF–207-sonli Farmoni ijrosi doirasida amalga oshirilayotgan ishlar tahlil qilinib, aniqlangan kamchiliklarni bartaraf etish boʻyicha masʼullarga tegishli topshiriqlar berildi.

Ayni paytda viloyatning barcha hududlarida Yangi yil bayramiga tayyorgarlik koʻrish, bayram tadbirlari oʻtkaziladigan joylarda xavfsizlik choralarini kuchaytirish, aholi osoyishtaligini taʼminlash va jinoyatchilikning oldini olishga qaratilgan ishlar izchil davom ettirilmoqda.

Surxondaryo viloyati IIB Axborot xizmati