Buxoro viloyati Qorakoʻl tumanida viloyat IIB boshligʻining navbatdagi sayyor qabuli tashkil etildi
2025-12-21 19:45:00 / Yangiliklar
Joriy yilning 21-dekabr kuni Qorakoʻl tumani “Madaniyat markazi” binosida Buxoro viloyati Ichki ishlar boshqarmasi boshligʻi tomonidan jismoniy va yuridik shaxslar, shuningdek viloyat ichki ishlar organlari xodimlarining sud-huquq hamda ichki ishlar organlarining kundalik xizmat faoliyati bilan bogʻliq masalalari yuzasidan sayyor shaxsiy qabul oʻtkazildi.
Mazkur shaxsiy qabul fuqarolar bilan ochiq va bevosita muloqotni yoʻlga qoʻyish, ularning murojaatlarini joyida tinglash hamda mavjud muammolarni tezkor va qonuniy hal etishga qaratilganligi bilan muhim ahamiyat kasb etdi. Qabul jarayonida jami 10 ga yaqin murojaatlar kelib tushib, ular orasida sud-huquq masalalari, xizmat faoliyati bilan bogʻliq muammolar, shuningdek ichki ishlar organlari vakolatiga taalluqli boshqa masalalar ham oʻrin oldi.
Har bir murojaat boʻyicha boshqarma boshligʻi tomonidan amaldagi qonunchilik talablari asosida batafsil tushuntirishlar berildi. Ayrim murojaatlar joyida ijobiy hal etilgan boʻlsa, qoʻshimcha oʻrganish va tekshiruv talab etiladigan masalalar yuzasidan tegishli soha masʼullariga aniq vazifalar yuklatilib, ularning ijrosi alohida nazoratga olindi.
Taʼkidlash joizki, bunday sayyor qabullar aholi va ichki ishlar organlari xodimlarining muammo hamda takliflarini oʻz vaqtida aniqlash, fuqarolarning huquqiy ongini oshirish, shuningdek ichki ishlar organlariga boʻlgan ishonchni yanada mustahkamlashda muhim ahamiyat kasb etadi.
Buxoro viloyati IIB Axborot xizmati