Xorazm viloyati Ichki ishlar boshqarmasi rahbariyati tomonidan fuqarolarning murojaatlarini oʻrganish maqsadida navbatdagi qabul oʻtkazildi
2025-12-21 19:00:00 / Yangiliklar
Joriy yilning 21-dekabr kuni Xorazm viloyati Ichki ishlar boshqarmasi rahbariyati tomonidan fuqarolarning murojaatlarini oʻrganish, ularni qiynayotgan masalalarga qonuniy va amaliy yechim topish hamda aholi bilan ochiq muloqotni taʼminlash maqsadida viloyat IIBning maʼmuriy binosida navbatdagi shaxsiy qabul oʻtkazildi.
Qabul jarayonida fuqarolar tomonidan ichki ishlar organlari faoliyatiga oid, shuningdek, huquqiy, ijtimoiy, maʼmuriy va maishiy yoʻnalishlardagi bir qator murojaatlar bildirildi. Murojaatlar jamoat tartibini taʼminlash, jinoyat ishlarini koʻrib chiqish, profilaktika inspektorlari faoliyati, fuqarolik-huquqiy munosabatlar hamda boshqa masalalarni qamrab oldi.
IIB rahbariyati tomonidan har bir murojaat sinchiklab tinglanib, ayrim masalalar boʻyicha joyida huquqiy tushuntirishlar berildi. Qoʻshimcha oʻrganish va tegishli chora koʻrishni talab etgan murojaatlar masʼul xizmat va boʻlinmalarga yuklatilib, ularning ijrosi boʻyicha qatʼiy nazorat oʻrnatildi.
Taʼkidlash joizki, ichki ishlar organlari faoliyatida fuqarolar bilan ochiq va samimiy muloqotni yoʻlga qoʻyish, murojaatlarni xolisona va adolatli koʻrib chiqish, har bir murojaat ortida inson manfaati turganini chuqur anglash ustuvor vazifalardan hisoblanadi.
Mazkur shaxsiy qabul fuqarolarning muammolarini oʻz vaqtida hal etish, huquqbuzarliklarning oldini olish hamda aholi va ichki ishlar organlari oʻrtasidagi oʻzaro ishonchni mustahkamlashga xizmat qildi.
Xorazm viloyati IIB Axborot xizmati