O‘zbеkiston Rеspublikаsi Ichki ishlаr vаzirligi

Yangi yil bayrami munosabati bilan ommaviy tadbirlar oʻtkazilishi rejalashtirilgan hududlarda jamoat xavfsizligini taʼminlash masalalari doimiy nazoratga olingan. Shu maqsadda, Oʻzbekiston Respublikasi Ichki ishlar vazirligi tomonidan Buxoro viloyatiga biriktirilgan masʼul — Turizm va transport obyektlarida xavfsizlikni taʼminlash departamenti boshligʻining birinchi oʻrinbosari hamda viloyat IIB rahbari tomonidan qator oʻrganish ishlari amalga oshirildi.

Dastlab, Buxoro viloyatidagi “Tezkor boshqaruv markazi”ga tashrif amalga oshirilib, hududlarda oʻrnatilgan videokuzatuv kameralari orqali vaziyatni onlayn monitoring qilish, huquqni muhofaza qiluvchi organlarning kuch va vositalarini oʻzaro hamkorlikda harakatlantirish tartibi, qidiruvda boʻlgan shaxslar hamda transport vositalarini aniqlash va ushlashdagi mexanizmlar muhokama qilindi. Shuningdek, ehtimoliy favqulodda holatlar yuzaga kelganda amalga oshirilishi lozim boʻlgan tezkor chora-tadbirlar yuzasidan aniq vazifalar belgilab olindi.

Shundan soʻng, masʼullar tomonidan bayram tadbirlari oʻtkazilishi rejalashtirilgan “Ark“ majmuasi, “Favvoralar maydoni“ hamda “Buxoro savdo majmuasi“ hududlarida oʻrganish ishlari olib borildi. Ushbu hududlarda jamoat tartibini saqlash, qoʻriqlash xizmatini samarali tashkil etish, favqulodda holatlarni oldini olish, fuqarolar xavfsizligini taʼminlashga qaratilgan chora-tadbirlar holati koʻzdan kechirildi.

Bundan tashqari, xizmatga jalb etilgan shaxsiy tarkibga qoʻshimcha yoʻriqnomalar berilib, kuchaytirilgan xizmat vaqtida intizomga qatʼiy rioya qilish, fuqarolar bilan xushmuomalada boʻlish hamda har qanday huquqbuzarlikka nisbatan tezkor va qonuniy chora koʻrish lozimligi alohida taʼkidlandi.

Mazkur oʻrganishlar aholi uchun bayram kunlarini tinch, xavfsiz va xotirjam oʻtkazishga xizmat qilishi bilan ahamiyatlidir.

Buxoro viloyati IIB Axborot xizmati