“Qamchiq” dovonida yoʻl harakati xavfsizligini taʼminlash choralari koʻzdan kechirildi
2025-12-18 11:25:00 / Yangiliklar
IIV JXD Yoʻl harakati xavfsizligi xizmati rahbari “Qamchiq“ dovonida amaliy tashrif bilan boʻldi. Dastlab YHXX rahbari “Chinor“ YPX maskanida oʻrnatilgan kuzatuv kameralarining integratsiya holatini koʻzdan kechirib, xodimlarning xizmat olib borish jarayoni bilan yaqindan tanishdi.
Shuningdek, “Qamchiqavtoyoʻl IYFK” DM hamda obodonlashtirish xizmati xodimlari bilan suhbat oʻtkazilib, mavjud maxsus texnikalarning texnik holati koʻzdan kechirildi. Qishki mavsum uchun moʻljallangan qum-tuz aralashmasi zaxirasi yetarli ekanligi tekshirildi.
Tashrif davomida A-373 avtomobil yoʻlining 106–108-kilometrlari oraligʻida olib borilayotgan taʼmirlash ishlari bilan tanishilib, yoʻl harakati xavfsizligini taʼminlashga qaratilgan chora-tadbirlar muhokama qilindi.
Shundan soʻng, “Namangan“ YPX maskanida yuk avtomobillarini koʻrikdan oʻtkazish uchun moʻljallangan “rentgen“ moslamasi hamda maskanda tashkil etilgan “qizil–yashil yoʻlak“ tizimi faoliyati bilan tanishdi. Bundan tashqari, Maʼmuriy amaliyot boʻlimida xizmat jarayonlari, xodimlar uchun yaratilgan shart-sharoitlar oʻrganilib, fuqarolar bilan suhbat oʻtkazildi.
Tashrif yakunida YHXX rahbari kuchaytirilgan xizmatga jalb etilgan shaxsiy tarkib ishtirokida yoʻriqnoma oʻtkazib, xizmatni hushyor va sergak holda olib borish, fuqarolar bilan xushmuomalada boʻlish, qoidabuzarliklarning oldini olish, shuningdek, pirotexnika vositalarining noqonuniy aylanmasiga qarshi kurashish boʻyicha aniq topshiriq va koʻrsatmalar berdi.
IIV JXD YHXX Axborot xizmati