Qoʻlbola usulda pirotexnika yasab sotmoqchi boʻlgan shaxs daliliy ashyolari bilan qoʻlga olindi
2025-12-17 09:00:00 / Yangiliklar
Toshkent viloyati IIBB va uning quyi tizim boʻlinmalari tomonidan boshqa huquqni muhofaza qiluvchi organlar bilan hamkorlikda pirotexnika vositalarining noqonuniy muomalasiga qarshi qaratilgan profilaktik tadbirlar izchil olib borilmoqda.
“Xavfsiz va sogʻlom yurt” tezkor-profilaktik tadbirlari doirasida Yangiyoʻl tumanida qoʻlbola usulda tayyorlangan pirotexnika vositalari bilan bogʻliq holat aniqlandi.
Xususan, tumanning “Paxta” mahallasida yashovchi 2010-yilda tugʻilgan fuqaro (U.A.)ning yashash xonadonida qoʻlbola usulda yasalgan, turli hajm va koʻrinishdagi 110 dona pirotexnika vositasi mavjudligi aniqlanib, belgilangan tartibda hujjatlashtirib olindi.
Maʼlum boʻlishicha, mazkur vositalar mustaqil ravishda tayyorlangan boʻlib, keyinchalik sotish maqsad qilingan.
Shuningdek, Toshkent tumanida oʻtkazilgan reyd tadbirlari davomida “Gentra” rusumli avtomashina haydovchisining transport vositasi yukxonasida qattiq ovoz chiqaruvchi pirotexnika vositalarini saqlab kelayotgani aniqlandi.
Har ikki holat yuzasidan tegishli tartibda qonuniy chora koʻrilib, pirotexnika vositalari musodara qilindi.
Toshkent viloyati IIBB Axborot xizmati