Toshkent viloyati ichki ishlar organlari Ekspert-kriminalistika xizmati xodimlari uchun navbatdagi oʻquv seminari tashkil etildi
2025-12-17 09:00:00 / Yangiliklar
Toshkent viloyati ichki ishlar organlari Ekspert-kriminalistika xizmati xodimlari uchun «Hodisa joyini koʻzdan kechirish, tergov harakatlari va tezkor-qidiruv tadbirlarida ishtirok etish mavzusida oʻquv seminari tashkil etildi.
Seminarda IIV Ekspert-kriminalistika bosh markazi boshligʻi, polkovnik Saidolim Nuriddinov hamda viloyat IIBB Ekspert-kriminalistika markazi boshligʻi, podpolkovnik Kamoliddin Tursunboyev ishtirok etib, mavzu doirasida tushuntirish va amaliy tavsiyalar berdilar.
Oʻquv mashgʻulotlarida viloyatning 22 ta tuman va shaharlaridan jalb etilgan ekspert-kriminalistika xodimlari ishtirok etdi.
Seminar davomida masʼul ekspert va IIV Akademiyasi oʻqituvchilari tomonidan hodisa joyini koʻzdan kechirish, ashyoviy dalillarni aniqlash va qadoqlash, shuningdek tergov hamda tezkor-qidiruv tadbirlarida kriminalistik texnika va vositalardan foydalanish boʻyicha amaliy mashgʻulotlar oʻtkazildi.
Shuningdek, sud-fotografiyasi qoidalari, isbotlov bazasini shakllantirish, portlash va yoʻl-transport hodisalari bilan bogʻliq voqea joylarini koʻzdan kechirish, tintuv va tergov tajribalarini oʻtkazish tartiblari boʻyicha nazariy maʼlumotlar berildi.
Yakunida yosh ekspertlar tomonidan berilgan sohaviy savollarga atroflicha javoblar berilib, amaliy koʻnikmalar mustahkamlandi.
Tadbir xodimlarining kasbiy tayyorgarligi va xizmat samaradorligini yanada oshirishga xizmat qildi.
Toshkent viloyati IIBB Axborot xizmati