Oʻzbekiston Respublikasi Ichki ishlar vazirligi va Germaniya xalqaro hamkorlik jamiyati (GIZ) oʻrtasida huquqbuzarliklar profilaktikasi sohasida hamkorlik masalalari muhokama qilindi
2025-12-17 09:00:00 / Yangiliklar
2025-yil 15-dekabr kuni Oʻzbekiston Respublikasi Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati rahbariyati hamda Germaniya xalqaro hamkorlik jamiyati (GIZ)ning “Markaziy Osiyoda zoʻravon ekstremizmning oldini olish” loyihasi rahbari Shtefan Buxmayer bilan uchrashuvi boʻlib oʻtdi.
Uchrashuvda ijtimoiy profilaktikani kuchaytirish, voyaga yetmaganlar oʻrtasida jinoyatchilikni oldini olish boʻyicha xalqaro tajribalar, xotin-qizlar masalalari boʻyicha inspektorlarni, inspektor-psixologlarni, Voyaga yetmaganlarga ijtimoiy-huquqiy yordam koʻrsatish markazlari xodimlarini xalqaro ekspertlar tomonidan oʻqitish boʻyicha batafsil suhbat olib borildi.
Shu bilan birga, 2023-yil 11-aprel kuni tasdiqlangan “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Qonuni borasida fikr almashildi.
Ichki ishlar vazirligi va Germaniya xalqaro hamkorlik jamiyati (GIZ)ning “Markaziy Osiyoda zoʻravon ekstremizmning oldini olish” loyihasi rahbari bilan hamkorlik qilish uchun ish rejasini ishlab chiqish kelishib olindi.
IIV Jamoat xavfsizligi departamenti Axborot xizmati