Buxoro shahrida favqulodda vaziyatlarning oldini olish va xavfsiz muhitni taʼminlash choralari oʻrganildi
2025-12-14 06:30:00 / Yangiliklar
Oʻzbekiston Respublikasi Prezidentining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi PQ-1-son qarori ijrosini taʼminlash, jinoyatchilik va huquqbuzarliklarning oldini olish, shuningdek, qish mavsumiga puxta tayyorgarlik koʻrish maqsadida, Buxoro viloyati hokimi Botir Zaripov boshchiligida viloyat prokurori, viloyat IIB boshligʻi, viloyat soliq boshqarmasi boshligʻi hamda tegishli mutasaddi tashkilotlardan iborat viloyat “ishchi guruhi” tomonidan Buxoro shahrida keng qamrovli oʻrganishlar olib borildi.
Oʻrganish jarayonida viloyat hokimi boshchiligidagi ishchi guruh Buxoro shahrining eski shahar qismida boʻlib, hududdagi tarixiy obidalar, umumiy ovqatlanish shoxobchalari va boshqa muhim obyektlarning qish mavsumida elektr energiyasi, tabiiy gaz, ichimlik suvi kabi kommunal xizmatlarda yuzaga kelishi mumkin boʻlgan favqulodda uzilishlarga tayyorgarligini koʻzdan kechirdi.
Tadbir davomida, Buxoro tumani “Bogʻidasht” MFYning shaharga yondosh hududidagi ajratilgan 40 gektar maydonda barpo etilayotgan “Yangi Oʻzbekiston bogʻi” ham ishchi guruh tomonidan oʻrganildi. Mazkur “yashil hudud” davlatimiz rahbari tomonidan belgilab berilgan vazifalar, viloyatda yaratilayotgan keng koʻlamli shaharsozlik va ijtimoiy infratuzilma rivoji jarayonida muhim loyihalardan biri ekanligi alohida taʼkidlandi.
Oʻrganish davomida aniqlangan kamchiliklar mutasaddilar ishtirokida muhokama qilinib, ularni bartaraf etishga qaratilgan zarur chora-tadbirlar belgilab berildi.
Mazkur oʻrganishlar PQ-1-son qarorida belgilangan vazifalarni amalda roʻyobga chiqarish, hududlarda xavfsiz muhitni shakllantirish, jinoyatchilikning barvaqt oldini olish hamda qish mavsumida aholiga uzluksiz xizmat koʻrsatishni taʼminlashga xizmat qiladi.
Buxoro viloyati IIB Axborot xizmati