Buxoro viloyatida afv etilgan fuqarolarning muammolari oʻrganilib, ularga amaliy koʻmak koʻrsatilmoqda
2025-12-13 09:45:00 / Yangiliklar
Prezidentimiz Shavkat Mirziyoyev tomonidan Oʻzbekiston Respublikasi Konstitutsiyasining 33-yilligi munosabati bilan davlatimizda olib borilayotgan insonparvarlik siyosatining amaliy ifodasi sifatida “Jazo muddatini oʻtayotgan, qilmishiga chin koʻngildan pushaymon boʻlgan va tuzalish yoʻliga qatʼiy oʻtgan bir guruh shaxslarni afv etish toʻgʻrisida”gi Farmoniga muvofiq, 615 nafar shaxs afv etildi. Ulardan 21 nafari — Buxoro viloyati fuqarolari hisoblanadi.
Farmonda belgilangan topshiriqlar ijrosi doirasida, 12-dekabr kuni Buxoro viloyati hokimi, viloyat prokurorining birinchi oʻrinbosari, viloyat ichki ishlar boshqarmasi boshligʻi hamda manfaatdor tashkilotlar masʼullari afv etilgan fuqarolar bilan uchrashuv oʻtkazdi.
Uchrashuv davomida har bir fuqaro bilan alohida suhbat oʻtkazilib, ularning holati, kelgusi rejasi, ijtimoiy hayotga moslashish imkoniyatlari oʻrganildi.
Rahbarlar tomonidan afv etilgan fuqarolarga bundan buyon xalqimiz va Prezident ishonchini oqlash, jamoat tartib-qoidalariga amal qilish, sogʻlom hayot tarzini yoʻlga qoʻyish hamda jamiyat hayotidagi oʻzgarish va yangilanishlarda faol ishtirok etish zarurligi tushuntirildi.
Jazodan ozod etilganlar qilgan ishlari uchun pushaymon ekanliklarini bildirib, koʻrsatilgan eʼtibor va ishonch uchun xalqimiz hamda hukumatimizga minnatdorlik izhor etdilar.
Buxoro viloyati IIB Axborot xizmati