Toshkentda Xalqaro avtomobil federatsiyasi (FIA) delegatsiyasi bilan avtosportni rivojlantirish va yoʻl harakati xavfsizligini kuchaytirish boʻyicha uchrashuv oʻtkazildi
2025-12-11 09:00:00 / Yangiliklar
Joriy yilning 10-dekabr kuni Toshkent shahrida FIA Bosh assambleyasida ishtirok etish maqsadida mamlakatimizga tashrif buyurgan Xalqaro avtomobil federatsiyasi Prezidenti Muhammad bin Sulaym boshchiligidagi delegatsiya bilan Ichki ishlar vaziri Aziz Tashpulatov hamda mamlakatimizda sportni rivojlantirish, xavfsizlikni taʼminlash va transport sohasi boʻyicha masʼul rahbarlar ishtirokida uchrashuv oʻtkazildi.
Tadbirda FIA delegatsiyasi tarkibida tashkilotning mobillik va turizm boʻyicha Vitse-prezidenti Tim Shirman va FIAning barqaror rivojlanish masalalari boʻyicha Bosh kotibi Villem Gryonevald, shuningdek Oʻzbekiston Respublikasi Prezidentining sport boʻyicha maxsus vakili Odil Abduraxmanov, Sport vaziri Adxam Ikramov, Milliy olimpiya qoʻmitasi raisining birinchi oʻrinbosari hamda Osiyo Olimpiya kengashi vitse-prezidenti Otabek Umarov, Milliy olimpiya qoʻmitasi Bosh kotibi Oybek Qosimov, Oʻzbekiston Avtosport va karting milliy federatsiyasining Bosh kotibi Aleks Soy hamda Sogʻliqni saqlash, Maktabgacha va maktab taʼlimi hamda Transport vazirlarining oʻrinbosarlari qatnashdilar.
Uchrashuvda ishtirokchilar tomonidan avtosportning rivojlanishi jamiyatda texnik savodxonlik, tezlikka masʼuliyatli munosabat va harakatda intizomni shakllantirishga xizmat qilishi taʼkidlandi.
Tadbir davomida avtosport sohasi bilan bir qatorda yoʻl harakati xavfsizligini taʼminlash masalalariga ham alohida eʼtibor qaratildi. Xususan, Ichki ishlar vazirligi tomonidan aholi xavfsizligi, yoʻl-transport hodisalarini kamaytirish, piyodalar muhofazasini kuchaytirish va harakat ishtirokchilarining madaniyatini oshirishga qaratilgan tizimli chora-tadbirlar xususida batafsil maʼlumot berildi.
Tomonlar, FIA bilan hamkorlikda Oʻzbekistonda avtosportni rivojlantirish, FIAning yoʻl harakati xavfsizligi boʻyicha ilgʻor amaliyotlarini yurtimizdagi oʻquv markazlariga joriy etish, yoshlar oʻrtasida yoʻl harakati qoidalariga rioya etish madaniyatini oshirish, taʼlim muassasalarida yoʻl harakati xavfsizligini oʻqitish boʻyicha zamonaviy yechimlar, shuningdek xalqaro tajribalar asosida yoʻl infratuzilmasini takomillashtirish masalalari keng muhokama qilindi.
Tadbir soʻngida tomonlar mamlakatimizda avtosportni rivojlantirish, yoʻl harakati xavfsizligini taʼminlash jarayoniga zamonaviy axborot texnologiyalarini joriy etish hamda aholi oʻrtasida yoʻl qoidalariga rioya etish madaniyatini oshirishga qaratilgan istiqbolli vazifalarni belgilab oldilar.