Halollikni shior qilgan xodimlar. Vijdon qalʼasi mustahkam boʻlsa...
2025-12-10 23:00:00 / Yangiliklar
Korrupsiyaga qarshi kurashish haqida koʻp gapiriladi. Lekin baʼzan birgina voqea butun tizimda qanday oʻzgarishlar sodir boʻlayotganini boshqalardan koʻra aniqroq koʻrsatadi. Soʻnggi ikki holat — aynan shunday koʻzgu. Ularda xodimlarning halolligi, xizmat burchiga sadoqati va jamiyatga boʻlgan masʼuliyati yaqqol namoyon boʻldi.
Birinchi holat. Tonggi yoʻlda boshlangan sinov.
Soat hali 07:05. Koʻchalar “uygʻonib” ulgurmagan, biroq viloyat IIB JXX YHXB boʻlinmalari YPX batalyoni 2-safarbar guruhi YPX inspektori, safdor Sarvarbek Sotliqov allaqachon xizmatda edi. Toʻxtatilgan “Lacetti” avtomashinasi haydovchisidan spirtli ichimlik hidi anqib turardi. Tekshiruv natijasi ham buni tasdiqladi: haydovchi 627 mg/l darajada mast. Bu — oʻzi bilan birga boshqalarning hayotiga ham xavf soladigan holat. Dafʼatan haydovchi vaziyatni yengillashtirish uchun inspektorga 10 million soʻm uzatmoqchi boʻldi. Goʻyo qonunni pul bilan almashtirish mumkin degandek... Ammo Sarvarbek toʻgʻri yoʻlni tanladi. Roga berayotgan paytda haydovchining oʻzi ushlandi, barcha ish rasmiylashtirildi.
Bu voqea shuni koʻrsatdiki, tizim halollik bilan nafas ola boshlagan joyda poraga imkon qolmaydi.
Ikkinchi holat. Toshqin oldidan sukut.
Toʻrtkoʻl tumani... Sokin boshlangan kun viloyat IIV M va FRB MTB inspektori, mayor Umidbek Yusupov uchun sinovga aylandi. Qurilish bilan shugʻullanadigan fuqaro M.Taganderdiyev mayor huzuriga kelib, 10 nafar xorijlik ishchisi maʼmuriy javobgarlikka tortilayotganini aytdi. Bu qonuniy jarayon edi. Ammo fuqaroning keyingi harakati — qonuniy yoʻlni pul bilan oʻzgartirishga urinish edi. U mayor Yusupovga 18 million soʻmlik pora taklif qildi. U shuni oʻyladi: “Pul boʻlsa, muammo boʻlmaydi”. Lekin unutilgan bir haqiqat bor: halollikni pul bilan sotib olib boʻlmaydi. Mayor Yusupov noqonuniy taklifni rad etdi.
Aslida rad etishning oʻzi ham jasorat. Chunki pora — odamni boshqalarning koʻziga koʻrinmaydigan joyda sinaydigan dushman. Fuqaro aynan pora uzatmoqchi boʻlgan paytda qoʻlga olindi, holat rasmiylashtirildi. Bu ham tizimdagi halollikning yana bir namunasi.
Xulosa shuki, Sarvarbekning tongdagi qarori ham, Umidbekning sokin kun ichidagi qatʼiyati ham bitta haqiqatni isbotlaydi: tizim halol xodimlar tufayli mustahkamlanadi.
Pul bilan oʻzgartirilmaydigan qarorlar esa jamiyatni korrupsiya atalmish illatdan tozalaydi.
©️ “Postda” gazetasi, Nilufar Jabborova.