IIV Akademiyasi rahbariyati Navoiy viloyatidagi kriminogen vaziyati murakkab mahallalarda olib borilayotgan ishlar bilan tanishdi
2025-12-07 09:00:00 / Yangiliklar
“Beshkent”, “Argʻun”, “Navbahor”, “Sharq” MFYlarida boʻlib oʻtgan uchrashuvlarda kriminogen omillarni bartaraf etishga qaratilgan chora-tadbirlar birma-bir muhokama qilindi. “Yoʻl xarita”lar ijrosi boʻyicha masʼullar va “mahalla yettiligi” vakillarining axboroti tinglandi.
Akademiya boshligʻi mahallalarda yechimini kutayotgan har bir masalaga atroflicha toʻxtaldi. Taʼlim muassasasiga biriktirilgan boshqa hududlarga qaraganda mazkur mahallalarda qilinishi lozim boʻlgan talay vazifalar borligini taʼkidladi.
Masʼullarga xavfsiz koʻcha va uylarni tashkil etish, “jinoyat oʻchoq”larida kriminogen vaziyatni barqarorlashtirish, hududlarni qoʻshimcha kamera va tashvish tugmalari bilan taʼminlash ishlarini jadallashtirish yuzasidan topshiriqlar berdi.
Shuningdek, mahalla faollari bilan yoshlar jinoyatchiligi omillari ham muhokama qilindi.
Ayrim oʻsmir yigit-qizlar giyohvandlik vositalari va psixotrop moddalarning noqonuniy muomalasi bilan bogʻliq huquqbuzarliklar sodir qilayotgani, yoshlar oʻrtasida bu kabi illatlarning barvaqt oldini olish uchun targʻibot tadbirlari qamrovini oshirish, ularning bandligini taʼminlash, uyushmagan qatlam bilan manzilli ishlash, oilalarda maʼnaviy muhitni yaxshilash, ijtimoiy profilaktikaga alohida eʼtibor qaratish zarurligi aytib oʻtildi.
Akademiya boshligʻi Ichki ishlar vazirligi akademik litseyi faoliyatini ham oʻrgandi. Maskanda yaratilgan sharoitlar bilan tanishish jarayonida rahbarlar va oʻqituvchi-murabbiylar bilan muloqot qildi.
Maʼnaviy tahdidlar, ayniqsa kiberxurujlar kuchayib borayotgan hozirgi sharoitda taʼlim va tarbiyani uzviy holda tashkil etish, yoshlarda axborot xurujlariga qarshi barqaror immunitet hosil qilish, ularni ona Vatanimizga sodiq, chinakam vatanparvar kadr etib tayyorlash eng muhim vazifa ekanligi aytib oʻtildi.
Shu kuni tajribali oʻqituvchilar va faol oʻquvchilarga tashakkurnoma berildi.
Xizmat safari davomida viloyat Ichki ishlar boshqarmasida akademiyani tamomlagan yosh xodimlar bilan uchrashuv ham tashkil etildi.
Yigʻilishda ularning faoliyati tahlil qilinib, yoshlarda xizmatga moslashish, kasbiy bilimlarni amaliyotda samarali qoʻllash, ruhiy barqarorlik hamda boshqa zarur xislatlarni shakllantirishga qaratilgan vazifalar belgilab olindi.
IIV Akademiyasi Axborot xizmati