Sirdaryo viloyatida xavfsizlikni taʼminlash boʻyicha ishchi guruhlar tashkil etildi
2025-12-07 09:00:00 / Yangiliklar
Sirdaryo viloyati Ichki ishlar boshqarmasi boshligʻi huzurida shahar va tumanlar kesimida videoselektor tarzida oʻtkazilgan yigʻilishda hududlarda jinoyatchilikning oldini olish, aholining xavfsizligini taʼminlash va profilaktika ishlarini kuchaytirish boʻyicha qoʻshimcha vazifalar belgilandi.
Videoselektor yigʻilishida barcha shahar va tumanlarda profilaktika inspektorlari ishtirokida, Gaz taʼminoti tizimi hamda Favqulodda vaziyatlar boshqarmasi xodimlaridan iborat kichik ishchi guruhlar tashkil etilishi koʻrsatib oʻtildi. Ushbu guruhlar faoliyati aholining hayoti hamda mulki xavfsizligini taʼminlashga qaratilgani taʼkidlandi.
Ishchi guruhlarga quyidagi vazifalar yuklatildi:
- qurilish obyektlarida ishchilarning yashash sharoitlarini joyiga chiqib oʻrganish;
- gaz va elektr jihozlaridan foydalanish xavfsizligini oʻrganish;
- gaz va koʻmirdan zaharlanish holatlarining oldini olish boʻyicha targʻibot va tushuntirish ishlarini kuchaytirish;
- yashash joyiga ega boʻlmagan shaxslarni toʻliq roʻyxatga olish va nazoratni kuchaytirish;
- spirtli ichimlikka ruju qoʻygan yoki xavf guruhi ostida turgan oilalarni xavfsizligini taʼminlash maqsadida kuchaytirilgan nazoratga olish;
- jinoyatlarni erta aniqlash va bartaraf etish maqsadida muntazam tungi reydlarni tashkil etish;
- yakka-yolgʻiz, ijtimoiy himoyaga muhtoj fuqarolarni alohida nazoratga olish.
Videoselektor yigʻilishida masʼullarga doimo hushyorlikni oshirish, hududlarda xavfsizlik choralarini kuchaytirish hamda aholining hayoti, sogʻligʻi va mulki daxlsizligini taʼminlash yuzasidan aniq topshiriqlar berildi.
Mazkur chora-tadbirlar viloyatda jinoyatchilikning oldini olish, aholi xavfsizligini taʼminlash va profilaktika ishlarini tizimli ravishda kuchaytirishga qaratilgan amaliy harakatlarning navbatdagi bosqichidir.
Sirdaryo viloyati IIB Axborot xizmati