Konstitutsiya kuni munosabati bilan Qashqadaryo viloyati kuch tuzilmalari oʻrtasida “Zakovat” intellektual bellashuvi oʻtkazildi
2025-12-05 10:00:00 / Yangiliklar
Oʻzbekiston Respublikasi Konstitutsiyasi qabul qilingan kun munosabati bilan Qashqadaryo viloyatida kuch tuzilmalari oʻrtasida “Zakovat” intellektual oʻyini oʻtkazildi.
Ushbu tadbir nafaqat bayram shukuhini his ettirdi, balki turli idoralar xodimlarining bilim salohiyatini oshirish, oʻzaro fikr almashish va jamoaviy ruhni mustahkamlashga xizmat qildi.
Bellashuv Qashqadaryo viloyati Ichki ishlar boshqarmasi, Yoshlar ittifoqi viloyat kengashi hamda viloyatdagi boshqa kuch tuzilmalari hamkorligida tashkil qilindi. Tadbir davomida ishtirokchilarga tarix, qonunchilik, mantiqiy fikrlash, ijtimoiy hayot va umumiy savodxonlikka oid savollar taqdim etildi.
Jamoalar tezkor fikrlash, jamoaviy hamkorlik va bilimni amaliy qoʻllash borasida kuch sinashdi.
Tadbirning asosiy maqsadi — Konstitutsiyaning mazmun-mohiyatini yanada keng targʻib qilish, xodimlar oʻrtasida intellektual salohiyatni rivojlantirish, kuch tuzilmalari oʻrtasida hamkorlik va doʻstlik aloqalarini mustahkamlashdan iborat boʻldi.
Bellashuv yakunlariga koʻra:
1-oʻrin — Qashqadaryo viloyati Ichki ishlar boshqarmasi jamoasi;
2-oʻrin — Viloyat bojxona boshqarmasi jamoasi;
3-oʻrin — Mudofaa vazirligiga qarashli harbiy qism hamda Milliy gvardiya viloyat boshqarmasi jamoalari
Gʻolib va sovrindor jamoalar tashkilotchilar tomonidan diplom va esdalik sovgʻalari bilan taqdirlandi.
Tadbir yakunida ishtirokchilar bu kabi intellektual loyihalar nafaqat bilimni oshirishi, balki kuch tuzilmalari oʻrtasidagi oʻzaro hurmat, birdamlik va ijobiy muhitni mustahkamlashda muhim omil ekanligini taʼkidladilar.
Qashqadaryo viloyati IIB Axborot xizmati