Namangan viloyatining Kosonsoy va Davlatobod tumanlarida ichki ishlar organlari faoliyati samaradorligini oshirish maqsadida manzilli oʻrganishlar oʻtkazildi
2025-12-04 18:25:00 / Yangiliklar
Namangan viloyatining barcha shahar va tumanlarida ichki ishlar organlari xodimlarining tungi xizmat faoliyati, shuningdek kunduzgi vaqtlarda mahallalarda amalga oshirilayotgan ishlar oʻrganilib, sodir etilayotgan jinoyatlar tizimli ravishda muhokama qilib borilmoqda.
Jumladan, Kosonsoy tumanida tuman hokimi va prokurori ishtirokida oʻtkazilgan kompleks oʻrganishlar davomida dastlab “Jar” mahallasi profilaktika inspektorining faoliyati tahlil qilinib, yoʻl qoʻyilgan kamchiliklar yuzasidan masʼullar qatʼiy ogohlantirildi va kelgusida amalga oshirilishi zarur boʻlgan choralar belgilab berildi. Shu bilan birga, tuman IIB hamda u yerda tashkil etilgan kuz-qish shtabi faoliyati, “Sogʻlom va xavfsiz yurt” keng qamrovli profilaktik tadbirlari natijalari tanqidiy muhokama qilinib, masʼul xodimlarga aniq vazifalar yuklatildi.
Bundan tashqari, “Olmazor” mahallasi hududida sodir etilgan oila-turmush doirasidagi ogʻir turdagi jinoyatlar sabablari chuqur tahlil qilindi va bu yoʻnalishda mahalla hamda tuman IIB masʼullariga tegishli topshiriqlar berildi.
Shuningdek, Davlatobod tumanida oʻtkazilgan oʻrganishlar davomida tungi xizmat faoliyati bilan bir qatorda ijtimoiy soha obyektlarining qish mavsumiga tayyorgarligi ham koʻrib chiqildi. Avvalo, “Yuksalish” mahallasidagi huquq-tartibot maskani xodimlarining xizmat faoliyati tahlil qilinib, jinoyatchilikni oldini olish boʻyicha amalga oshirilayotgan ishlar muhokama qilindi. Shuningdek, “Yuksalish”, “Tadbirkor”, “Orzu”, “Ijodkor”, “Yelxon”, “Nurobod”, “Navroʻz” va “Gulshan” mahallalarida xizmat olib borayotgan tungi naryadlarga yoʻriqnoma oʻtkazilib, xizmatni samarali tashkil etish yuzasidan aniq vazifalar belgilab berildi.
Shundan soʻng, “Yuksalish” mahallasidagi koʻp qavatli uylarga xizmat koʻrsatuvchi boshqaruv servis kompaniyasi faoliyati, “Tadbirkor” mahallasidagi bolalar shifoxonasining qish mavsumiga tayyorgarlik holati va bemorlarga yaratilgan shart-sharoitlar oʻrganildi. Mavsumni betalofat oʻtkazish, aholining murojaatlariga tezkor munosabat bildirish va zarur choralarni koʻrish yuzasidan topshiriqlar berildi.
Manzilli oʻrganish va muhokamalar Namangan viloyatining barcha tumanlarida bosqichma-bosqich davom ettirilmoqda.
Namangan viloyati IIB Axborot xizmati