Minsk shahrida sud-ekspertizaning yangi texnologiyalari va DNK identifikatsiyasi boʻyicha amaliy oʻquv mashgʻulotlari tashkil etildi
2025-12-04 13:50:00 / Yangiliklar
Joriy yilning 24–28-noyabr kunlari Belarus Respublikasi Sud ekspertizalari davlat qoʻmitasi hamda Sud ekspertizalari davlat qoʻmitasi huzuridagi Kadrlarni qayta tayyorlash va malakasini oshirish institutida “Sud-ekspertlik faoliyatini yanada takomillashtirish, xususan sud ekspertizasining yangi usullari, innovatsion va istiqbolli texnologiyalar bilan tanishish, tajriba almashish hamda bilim va koʻnikmalarni oshirish” mavzusidagi oʻquv kurslari oʻtkazildi. Shuningdek, tashrif doirasida Minsk shahridagi “Regula” kompaniyasi faoliyati bilan ham tanishildi.
Ushbu oʻquv kurslarida Oʻzbekiston Respublikasi Ichki ishlar vazirligi Ekspert-kriminalistika bosh markazi Genetik tadqiqotlar va shaxsning genom axborotini davlat roʻyxatiga olish boʻlimi ekspertlari ham ishtirok etdilar.
Tashrif davomida ishtirokchilar odam DNKsi va shaxsni identifikatsiya qilish laboratoriyalarida boʻlib, mitoxondrial DNK tahlili, Y-xromosoma asosida tekshirish usulida qoʻllaniladigan reagentlar, biologik materiallardan DNK ajratishda foydalaniladigan uskuna va qurilmalarning ishlash prinsiplari bilan tanishdilar.
Belarus Respublikasi Sud ekspertizasi qoʻmitasi huzuridagi Kadrlarni qayta tayyorlash va malakasini oshirish institutida olib boriladigan taʼlim jarayonlari, zamonaviy oʻquv dasturlari va amaliyotga yoʻnaltirilgan oʻquv modullari ishtirokchilarda katta qiziqish uygʻotdi.
IIV Ekspert-kriminalistika bosh markazi