Buxoro viloyatida xavfsiz muhitni taʼminlash yoʻlida keng qamrovli oʻrganish ishlari amalga oshirildi
2025-12-04 13:45:00 / Yangiliklar
Oʻzbekiston Respublikasi Prezidentining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi PQ-1-son qarori ijrosini taʼminlash maqsadida Buxoro viloyatida hududlarning qish mavsumiga tayyorgarligi, jinoyatchilik va huquqbuzarliklarning oldini olish boʻyicha keng koʻlamli oʻrganishlar oʻtkazildi. Viloyat hokimi boshchiligidagi “ishchi guruhi” tarkibida viloyat prokurori, IIB boshligʻi, soliq boshqarmasi rahbari hamda boshqa mutasaddi tashkilotlar vakillari ishtirok etdi.
Tashrif davomida dastlab, Kogon shahar “Savdo majmuasi”da raqamlashtirish jarayonlari, hududda huquqbuzarlik va jinoyatlarning oldini olishga qaratilgan chora-tadbirlar, shuningdek, Kogon tumanidagi “Suxor” mahallasida “Yashil makon” umummilliy loyihasi doirasida amalga oshirilayotgan ishlar atroflicha koʻrib chiqildi. Mazkur yoʻnalishlarda jinoyatchilikni erta aniqlash va profilaktik nazoratni kuchaytirish masalalariga alohida eʼtibor qaratildi.
Keyingi manzil, Peshku tumani hamda Vobkent “Markaziy dehqon bozori“ boʻlib, bu yerda bozor hududlarini raqamlashtirish, bozor hududida huquqbuzarliklarning oldini olish, sotuvchilar tomonidan narx-navoni asossiz oshirish holatlarini bartaraf etish borasidagi masalalar batafsil muhokama qilindi. Savdo tartibi ustidan nazoratni kuchaytirish va noqonuniy harakatlarning oldini olish boʻyicha aniq vazifalar belgilandi.
Tashrifning soʻnggi qismi Buxoro shahridagi “Hududgaz Buxoro” filialida davom etdi. Bu yerda gaz tarmoqlariga noqonuniy ulanib olish, talon-toroj, texnika xavfsizligi qoidalariga rioya qilinmagani oqibatida yuzaga kelishi mumkin boʻlgan xavfli holatlarning oldini olish choralari koʻrib chiqildi. Shuningdek, favqulodda holatlarda tezkorlik bilan javob berish imkoniyatlarini oshirish maqsadida, avariya dispetcherlik xizmati xodimlari uchun toʻliq jihozlangan 17 ta yangi “104 — gaz avariya xizmati” avtomashinasi tantanali ravishda topshirildi.
Buxoro viloyati IIB Axborot xizmati