Odam savdosi boʻyicha qidiruvda boʻlgan ayol Turkiyadan ekstraditsiya qilindi
2025-12-02 10:50:00 / Yangiliklar
Oʻzbekiston Respublikasi Ichki ishlar vazirligi Tezkor-qidiruv departamenti hamda Turkiya Respublikasining Istanbul shahridagi Bosh konsulxonasi hamkorligida qidiruv tadbirlari amalga oshirildi.
Samarali hamkorlik natijasida 2021-yildan beri odam savdosi bilan shugʻullangani uchun qidiruvda boʻlgan ayol qoʻlga olindi va Turkiyadan Oʻzbekistonga ekstraditsiya qilindi.
Tergov hujjatlariga koʻra, ushbu ayol yuqori maosh vaʼdasi bilan qizlarni aldab Turkiyaga olib borgan, u yerda esa ularning fuqarolik pasportlarini tortib olib, fohishalik bilan shugʻullanishga majburlagan.
1991-yilda tugʻilgan ushbu shaxsga nisbatan Oʻzbekiston Respublikasi Jinoyat kodeksining 135-moddasi 2-qismi bilan jinoyat ishi qoʻzgʻatilib, qidiruv eʼlon qilingan, olib borilgan tezkor choralar natijasida uning Istanbul shahrida yashirinib yurganligi aniqlangan.
Mazkur shaxs Turkiya hududida qoʻlga olinib, joriy yilning 18-noyabr kuni belgilangan tartibda Oʻzbekiston Respublikasiga ekstraditsiya qilindi.
Ikki davlatning Interpol milliy markaziy byurolari oʻrtasidagi oʻzaro hamkorlik va muvofiqlashtirilgan tezkor harakatlar mazkur qoʻshma faoliyatning samarali amalga oshirilishiga xizmat qildi.
Joriy yildan Oʻzbekistonda odam savdosi uchun belgilangan jazo choralari kuchaytirildi. Amaldagi qonunchilikka muvofiq, bunday jinoyat uchun 5-yildan 15-yilgacha ozodlikdan mahrum qilish jazosi belgilangan.
Hurmatli fuqarolar! “Xorijda ish bor, yaxshigina daromad topasiz”, deydigan “hojatbaror”larning vaʼdalariga ishonib qolmang. Yoʻqsa, oʻzingiz bilmagan holda odam savdosi qurboniga aylanib qolishingiz mumkin.