Ichki ishlar vazirligi va hududiy boshqarmalarda aholi bilan ochiq muloqot boʻyicha navbatdagi qabullar oʻtkazildi
2025-12-01 02:00:00 / Yangiliklar
Maʼlumki, Davlatimiz rahbari tomonidan belgilab berilgan ustuvor vazifalardan biri — aholi bilan ochiq va samarali muloqotni yoʻlga qoʻyishdir.
Bugungi kunda bu tamoyil barcha davlat organlari faoliyatida asosiy mezon sifatida mustahkamlanib bormoqda. Shu munosabat bilan joriy yilning 30-noyabr kuni Ichki ishlar vazirligi masʼul rahbarlari ishtirokida fuqarolar bilan shaxsiy qabul tashkil etildi.
Qabul davomida vazirlik tizimi faoliyatiga oid turli yoʻnalishlar boʻyicha jami 592 ta murojaat kelib tushdi. Murojaatlar bilan ishlash jarayonida nafaqat mavjud muammolarni oʻrganish, balki aholi real ehtiyojlarini aniqlash, muammolarning kelib chiqish sabablarini tahlil qilish va ularni tizimli hal etishga alohida eʼtibor qaratildi.
Mazkur murojaatlarning 285 tasi (48%) tezkor tarzda, huquqiy asoslar bilan ijobiy hal etildi. Qolgan 307 ta murojaat (52%) boʻyicha esa qoʻshimcha oʻrganish va sohaviy organlar bilan hamkorlikda choralar koʻrish talab etilgani bois, ular nazoratga olinib, ijrosi boʻyicha masʼullarga aniq topshiriqlar yuklatildi.
Shu bilan birga, Qoraqalpogʻiston Respublikasi Ichki ishlar vazirligi, Toshkent shahri, Toshkent viloyati ichki ishlar bosh boshqarmalari hamda viloyatlar ichki ishlar boshqarmalari rahbarlari tomonidan joylarda oʻtkazilgan shaxsiy qabullar davomida 397 ta murojaat qabul qilindi. Ularning 155 tasi (39%) qabul jarayonidayoq ijobiy hal etildi, 242 ta murojaat (61%) esa qoʻshimcha oʻrganish hamda nazorat asosida hal etilishi uchun yuborildi.
Ichki ishlar organlarining barcha darajadagi rahbarlari tomonidan shaxsiy va sayyor qabullar oʻtkazish, fuqarolar murojaatlarini oʻrganish va hal etish amaliyoti mamlakatning barcha hududlarida izchil davom etmoqda. Bu, oʻz navbatida, aholi ishonchini mustahkamlash, davlat organlari ochiqligi va javobgarligini taʼminlashda muhim qadam boʻlib xizmat qilmoqda.