Mahallalardan chegara postigacha – Toshkent viloyati boʻylab profilaktik tadbirlar izchil davom etmoqda
2025-11-29 09:00:00 / Yangiliklar
“Xavfsiz va sogʻlom yurt” tezkor-profilaktika oyligi doirasida Toshkent viloyatida huquqbuzarliklar profilaktikasini kuchaytirish, jinoyatchilikning oldini olish va aholi xavfsizligini taʼminlashga qaratilgan tizimli ishlar izchil davom etmoqda.
Oʻzbekiston Respublikasi Prezidentining 2017-yil 14-martdagi PQ–2833-son qarorida belgilangan vazifalar asosida har hafta oʻtkazilayotgan “Huquqbuzarliklar profilaktikasi kuni” viloyatda amaliy natija bermoqda.
Bugungi profilaktika tadbirlarida viloyat IIBB va uning quyi tizimlari tomonidan bir nechta yoʻnalishlarda izchil ishlar olib borildi.
Probatsiya nazoratidagi shaxslar bilan uchrashuvlarda ularga qonunbuzarlikning oqibatlari, belgilangan tartib-qoidalarga rioya etish hamda jamiyat tomonidan berilayotgan imkoniyatni toʻgʻri baholash boʻyicha tushuntirishlar berildi. Mehnatga jalb etilish, ijtimoiy moslashuv va hayotda faol boʻlishga oid tavsiyalar ham yetkazildi.
Shuningdek, ogʻir va oʻta ogʻir jinoyat sodir etgan, probatsiya roʻyxatida turgan shaxslar bilan yakka tartibdagi suhbatlar oʻtkazilib, ularga qayta jinoyat sodir etmaslik boʻyicha rasmiy ogohlantirishlar berildi va huquqiy savollariga javob berildi.
Mahallalar miqyosida oila va ijtimoiy muammolarga alohida eʼtibor qaratildi. Ajrim yoqasidagi oilalar, himoya orderi asosida kuzatuvdagi shaxslar hamda ijtimoiy himoyaga muhtoj fuqarolar bilan oʻtkazilgan suhbatlarda oilaviy totuvlikni mustahkamlash va nizolarni bartaraf etish boʻyicha tavsiyalar berildi.
Profilaktika kuni davomida jinoyatchilikka moyil shaxslar bilan, shuningdek chegara posti hududida ham tushuntirish ishlari olib borildi.
Masʼul xodimlar tomonidan jamoat tartibini saqlash, huquqbuzarlik oqibatlari va yoshlar oʻrtasida huquqiy ongni oshirishga qaratilgan muloqotlar tashkil etildi.
Bundan tashqari, yoʻl harakati xavfsizligini taʼminlashga doir infratuzilma tadbirlari davom ettirilib, piyodalar harakati tigʻiz boʻlgan hududlarda yangi yoʻlaklar chizildi va zamonaviy yoʻl belgilari oʻrnatildi.
Bu chora-tadbirlar aholining kundalik harakati, bolalar va keksalarning xavfsiz yurishini taʼminlashga xizmat qilmoqda.
Mazkur tashabbuslar jinoyatchilikning oldini olish, jamoat xavfsizligini mustahkamlash, fuqarolarning huquqiy savodxonligini oshirish va viloyatdagi ijtimoiy barqarorlikni taʼminlashga xizmat qilmoqda.
Muntazam olib borilayotgan profilaktika ishlari esa huquqbuzarliklarni kamaytirishda muhim omil boʻlib qolmoqda.
Toshkent viloyati IIBB Axborot xizmati