Buxoro viloyati IIB hamda IIV Akademiyasi rahbariyati ishtirokida kriminogen vaziyati murakkab boʻlgan mahallalardagi xavfsizlik tizimini takomillashtirish masalalari muhokama qilindi
2025-11-27 11:10:00 / Yangiliklar
Buxoro viloyati IIB hamda IIV Akademiyasi rahbariyati tomonidan Oʻzbekiston Respublikasi Prezidentining 2025-yil 3-yanvardagi PQ–1-sonli “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi qarori ijrosini taʼminlash doirasida amalga oshirilayotgan ishlar yuzasidan keng qamrovli yigʻilish oʻtkazildi.
Shuningdek, yigʻilishda Oʻzbekiston Respublikasi Prezidentining 2025-yil 18-avgustdagi PQ–253-sonli qarorida belgilangan vazifalarga muvofiq “qizil” toifaga ajratilgan mahallalarni xavfsiz hududga aylantirish boʻyicha olib borilayotgan tajriba va amaliyotlar muhokama qilindi.
Tadbirda Ichki ishlar vazirligi akademiyasi professor-oʻqituvchilari ishtirok etib, “S. Ayniy” mahallasida sinovdan oʻtkazilgan “Xabardor 24/7” mobil ilovasini viloyat miqyosida joriy etish, “A. Donish” mahallasida qoʻllangan yondashuv asosida talabalar oʻrtasida ijtimoiy profilaktikani kuchaytirishga qaratilgan “Xavfsiz oliy taʼlim muassasasi” tamoyilini bosqichma-bosqich tatbiq etish, “Shayx-ul Olam” mahallasida sinovdan oʻtgan “Geo-elektron kriminogen xarita” mobil ilovasini keng koʻlamda qoʻllash, “Pamoʻza” mahallasi tajribasiga tayangan holda huquqbuzarliklarni keltirib chiqaruvchi omillarni muntazam hisobga olish va monitoring qilish tizimini yoʻlga qoʻyish kabi bir qator innovatsion tajribalar taqdimoti bilan chiqish qildilar.
Yigʻilishda, shuningdek, mahallalarda olib borilayotgan kamerallashtirish ishlari, aholini roʻyxatga olish jarayonlari, IT texnologiyalari asosida boshqaruv tizimini takomillashtirish va “qizil” toifa mahallalarni izchil ravishda “sariq”, keyinchalik esa “yashil” toifaga oʻtkazish boʻyicha rejalar muhokama etildi.
Yigʻilishning ikkinchi qismida, Oʻzbekiston Respublikasi Prezidentining 207-sonli farmonida belgilangan vazifalar asosida joriy yilning 20-noyabridan 20-dekabriga qadar respublika boʻylab oʻtkazilayotgan “Xavfsiz va sogʻlom yurt” keng qamrovli tezkor-profilaktika tadbirining uchinchi bosqichi hamda viloyatda amalga oshirilayotgan “Xavfsiz hudud – dolzarb 50 kunlik” maxsus tadbir doirasida bajarilayotgan ishlar tanqidiy ruhda koʻrib chiqildi.
Shu bilan birga, ichki ishlar organlari tizimida raqamlashtirish jarayonlari, olib borilayotgan qurilish va taʼmirlash ishlari, shuningdek, voleybol hamda aralash jang sanʼati sport turlarini ommalashtirish boʻyicha amalga oshirilayotgan chora-tadbirlar yuzasidan ham muhokamalar oʻtkazilib, masʼullarga tegishli topshiriqlar berildi.
Yigʻilish yakunida, oliy taʼlim muassasalari talabalarini vaqtinchalik roʻyxatga qoʻyish tartibini takomillashtirish, xavfsizlikni yanada kuchaytirish maqsadida “S. Ayniy” mahallasiga qoʻshimcha kuch va vositalar jalb etish, tajribaviy loyihalarni boshqa hududlarga ham bosqichma-bosqich tatbiq etish kabi kelgusida amalga oshirilishi lozim boʻlgan bir qator ustuvor vazifalar belgilab olindi.
Buxoro viloyati IIB Axborot xizmati