Namanganda ayollar va qizlarga nisbatan zoʻravonlikka qarshi 16 kunlik aksiya doirasida davra suhbati oʻtkazildi
2025-11-26 10:00:00 / Yangiliklar
Davra suhbatida viloyat hokimligi va Namangan viloyati IIB masʼul xodimlari soʻzga chiqib, bugungi kunda raqamli makonda ayollar va qizlarga nisbatan sodir etilayotgan zoʻravonlikning turli koʻrinishlari va uning ijtimoiy-psixologik oqibatlari haqida batafsil toʻxtalib oʻtdi.
Taʼkidlash joizki, virtual makonda sodir boʻlayotgan tazyiqlar, tahdidlar, shaxsiy maʼlumotlarni ruxsatsiz tarqatish hamda kiberhujumlar yoki kiberzoʻravonlik holatlari jamiyat uchun jiddiy muammodir.
Bunday xatti-harakatlar ayollarning ruhiy holatiga taʼsir etishi, ijtimoiy hayotdan chekinishiga yoki oʻzini zaif his qilishiga sabab boʻlmoqda.
Shuningdek, ayollar va qizlar oʻz huquqlarini bilishi, zoʻravonlikning har qanday koʻrinishiga murosasiz boʻlishi hamda zarur hollarda davlat organlariga murojaat qilishi lozimligi alohida qayd etildi.
Tadbir davomida videorolik namoyish etilib, ishtirokchilarga raqamli zoʻravonlikning oldini olish boʻyicha foydali tavsiyalar berildi.
Uchrashuv yakunida ayollarning huquqiy madaniyatini oshirish va zoʻravonlikning har qanday shakliga qarshi kurashish boʻyicha kelgusidagi rejalar muhokama qilindi.
Namangan viloyati IIB Axborot xizmati