Toshkent shahar IIBB tashabbusi bilan “Biz zoʻravonlikka qarshimiz” shiori ostida tadbir boʻlib oʻtdi
2025-11-26 10:00:00 / Yangiliklar
“Xalqaro ayollarga nisbatan zoʻravonlikka barham berish kuni” munosabati bilan Ichki ishlar vazirligi Madaniyat saroyida Toshkent shahar IIBB tashabbusi bilan “Biz zoʻravonlikka qarshimiz” shiori ostida tadbir boʻlib oʻtdi.
Unda poytaxt IIBB rahbariyati, Oila va xotin-qizlar qoʻmitasi Toshkent shahar boshqarmasi, poytaxt tumanlari hokim oʻrinbosarlari, hududiy tuzilmalar masʼullari, xotin-qizlar masalalari boʻyicha katta inspektorlar, mahalla xotin-qizlar faollari va boshqa tashkilotlar mutasaddilari ishtirok etishdi.
Tadbirda qayd etilganidek, bugungi kunda xotin-qizlarimizning huquq va manfaatlarini taʼminlashga boʻlgan eʼtibor davlat siyosati darajasiga koʻtarilgan. Bu yoʻnalishda Prezidentimiz hamda Vazirlar Mahkamasi tomonidan qabul qilinayotgan qator qonun, farmon va qarorlar oʻz samarasini bermoqda.
Ushbu meʼyoriy hujjatlar asosida ayollarimizni har tomonlama qoʻllab-quvvatlash, tazyiq va zoʻravonlikdan jabrlangan xotin-qizlarga ijtimoiy, huquqiy, tibbiy xizmatlar koʻrsatish tizimi yaratilgan. “Inson” ijtimoiy markazi, Oila va xotin-qizlar boshqarmalari, sohaviy xizmatlar, mahalla yettiligi hamkorligida samarali ishlar olib borilmoqda.
Bu jarayonlardan maqsad, jamiyatimizda zoʻravonlikka, tazyiqqa qarshi kurashish, xotin-qizlarning huquq va erkinliklarini himoyalash, oilada ayolga nisbatan hurmat, mehr-muhabbat tuygʻusini shakllantirish, xotin-qizlarimizni jamiyatdagi faol ishtirokini taʼminlash kabilarni tashkil etadi.
Joriy yilda poytaxtimizda xonadonbay oʻrganish natijasida uch yarim mingdan ortiq nizoli oilalar aniqlanib, ular xavflilik darajasiga koʻra toifalarga ajratilgan.
Mazkur nizoli oilalarning barchasi ichki ishlar organlarining masʼullariga biriktirilgan. Prezidentimizning “Zoʻravonlik – bu jinoyat, zoʻravonlik bizning madaniyatimiz emas!” degan soʻzlari ham bu borada bizga dasturulamal boʻlib xizmat qilishi taʼkidlandi. Biriktiruv tizimini muvofiqlashtiruvchi poytaxt va tumanlar shtablari faoliyati yoʻlga qoʻyildi.
Nizoli oilalarni oʻrganish, tizimli chora-tadbirlar amalga oshirilishi jarayonida ikki yarim mingdan ortigʻida kelishmovchiliklar bartaraf etilib, mingdan ortiq oilalar yarashtirildi.
Biroq amalga oshirilayotgan ishlarga qaramay, ayrim oilalarda tazyiq va zoʻravonlik holatlari, huquqbuzarliklar va jinoyatlar sodir etilmoqda. Tazyiq va zoʻravonlik holatlarning oldini olish maqsadida xotin-qizlarga himoya orderi rasmiylashtirish uchun maxsus “E-himoya”, “SOS”, “E-order” kabi elektron tizimlar joriy etildi. Himoya orderi rasmiylashtirilgan xonadonlarga “Tashvish” tugmalari oʻrnatildi.
Joylarda xotin-qizlar masalalari boʻyicha inspektorlar tomonidan mahallalar, idora va tashkilotlar, oʻquv dargohlarida olib borilgan maʼnaviy-maʼrifiy tadbirlar, huquqiy savodxonligini oshirish boʻyicha targʻibot, suhbat va profilaktik uchrashuvlar oʻtkazildi.
Shu bilan birga, namunali oilalar, xotin-qizlar ragʻbatlantirilib borilmoqda. Davlatimiz tomonidan ayollarning taʼlim olishi, ishlashi, jamiyat boshqaruvidagi faoliyatini kuchaytirish boʻyicha yaratilayotgan shart-sharoitlar haqida soʻzga chiqqanlar tomonidan batafsil maʼlumot berildi.
Tadbirda soʻz olgan probatsiya hisobida turuvchi Sh.Nodira oʻz hayot yoʻlini izga solishda, halol mehnat bilan oilasini tebratishda katta yordam bergan ichki ishlar organlari xodimlariga oʻz minnatdorligini bildirdi.
Shuningdek, tuman masʼullari tomonidan tazyiq va zoʻravonlikka uchragan xotin-qizlar bilan amalga oshirilgan ishlar, “Biz zoʻravonlikka qarshimiz!” shiori ostida noyabr oyi davomida tashkillashtirilgan maʼrifiy-madaniy tadbirlarni yuqori darajada oʻtkazib, katta natijalarga erishgan bir guruh xotin-qizlar masalalari boʻyicha inspektorlar va mahalla xotin-qizlar faollari, tuman jamoalari yetakchilarini taqdirlash marosimi oʻtkazildi.
Tadbir yakunida hokimlik, mahalla masʼullari, tumanlar IIO FMB rahbarlariga xotin-qizlar, nizoli oilalar bilan yakka tartibda suhbat va profilaktik tadbirlar oʻtkazish, jinoyat qurboniga aylanishi mumkin boʻlgan ayollar bilan “viktimologik” profilaktik ishlarni, “xonadonbay” ishlash tizimini takomillashtirish, ayollar oʻrtasida jinoyatchilik, axloq-odob doirasidagi huquqbuzarliklarning oldini olish boʻyicha aniq va manzilli chora-tadbirlarni belgilash, yoshlarning turli ommaviy axborot vositalari, diniy ekstremistik oqimlar va terrorchi tashkilotlar taʼsiridan himoyalash boʻyicha chora-tadbirlar amalga oshirish boʻyicha qator vazifalar belgilandi.
Tadbirning rasmiy qismidan soʻng badiiy qismi “Parizoda” raqs ansambli, taniqli xonanda-sozandalar hamda Oʻzbekiston Davlat sanʼat va madaniyat instituti, respublika estrada va sirk kolleji talabalari tomonidan tayyorlangan musiqiy chiqishlar, sahna koʻrinishlari bilan davom ettirildi.
Toshkent shahar IIBB Axborot xizmati