Oʻzbekiston Respublikasi Prezidentining “Toshkent shahrida ekologik vaziyatni yaxshilash boʻyicha kechiktirib boʻlmaydigan chora tadbirlar toʻgʻrisida”gi farmoni ijrosini taʼminlash maqsadida Toshkent viloyati tumanlarida oʻrganish ishlari olib borilmoqda
2025-11-25 19:50:00 / Yangiliklar
Masʼullar tomonidan Toshkent tumanidagi issiqxonalar qozonlariga filtr oʻrnatilmaganligi natijasida atmosfera havosini ifloslantirayotganligi oʻrganildi.
Ayrim issiqxonalarning qozonlariga filtrlar umuman oʻrnatilmagan boʻlsa ayrim hollarda meʼyoridan koʻp koʻmir yoqilishi oqibatida filtrlar yaroqsiz holga kelgan va tabiatga zararli tutunni oʻtkazib yubormoqda. Bu tutunlar esa shamol yoʻnalishi boʻylab toʻgʻri Toshkent shahri tomon harakatlanyapti.
Har bir issiqxona egasidan Ekologiya, atrof muhitni muhofaza qilish va iqlim oʻzgarish boshqarmasi inspektorlari tomonidan kafolat xatlari olingan. Unga koʻra issiqxona qozoniga 99,5 foiz samaradorlikka ega chang gaz tozalash uskunalari oʻrnatilishi kerak, biroq aksariyat filtrlar bu talabga javob bermaydi.
Chiqindilarni yoʻq qilish tartibi va boshqa muhim holatlar boʻyicha ham mutaxassislar tomonidan issiqxona egalariga tushuntirish berildi. Noqonuniy faoliyat olib borgan ayrim tadbirkorlar esa elektr energiyasi taʼminotidan vaqtincha uzildi.
Oʻrganish ishlari dronlar yordamida ham olib borilmoqda. Toshkent tumanidagi Issiqxona qozoniga 99,5 foiz samaradorlikka ega filtr oʻrnatmagan, mavjud chang-gaz tozalash uskunalari talabga javob bermaydigan, meʼyoridan koʻp miqdorda koʻmir ishlatayotgan Qushqoʻndi, Xasanboy, Xasanboy guzari, Yunusobod, Oʻzgarish mahallalarida aniqlangan 8 ta holatda 6 ta issiqxona faoliyati toʻxtatildi.
Toshkent shahrida ekologik vaziyatni yaxshilash atmosfera havosini ifloslantirishga qarshi kurashish boʻyicha keng koʻlamli tadbirlar boshqa yoʻnalishlarda ham davom ettiriladi.