Qoraqalpogʻiston Respublikasi Ichki ishlar vaziri tomonidan jismoniy va yuridik shaxslarning murojaatlari yuzasidan navbatdagi shaxsiy qabuli oʻtkazildi
2025-11-25 11:30:00 / Yangiliklar
Qabulni Qoraqalpogʻiston Respublikasi Ichki ishlar vaziri shaxsan oʻtkazdi. Unda fuqarolar tomonidan turli sohalarga oid masalalar — jumladan, ishga joylashtirish, maʼmuriy jarayonlar, huquqbuzarliklarning oldini olish hamda ichki ishlar organlari faoliyatiga doir taklif va shikoyatlar bilan bogʻliq murojaatlar tinglandi.
Har bir murojaat alohida oʻrganilib, fuqarolarga huquqiy tushuntirishlar berildi. Joyida hal etish imkoni boʻlgan masalalar boʻyicha tegishli boʻlinmalar rahbarlariga aniq koʻrsatmalar berildi. Muddat talab etuvchi murojaatlar esa nazoratga olindi va ularni hal etish boʻyicha aniq chora-tadbirlar belgilab olindi.
Shu bilan birga, vazirlik rahbariyati tomonidan murojaatlarni qabul qilish tizimini takomillashtirish, fuqarolar bilan ochiq muloqotni kengaytirish hamda ularning ishonchini oshirishga qaratilgan ishlar izchil davom ettirilayotgani taʼkidlandi.
Shu kunga qadar oʻtkazilgan shaxsiy qabullar davomida yuzlab fuqarolarning murojaatlari koʻrib chiqilib, ularning aksariyati ijobiy hal etilgan. Bu esa aholi va ichki ishlar organlari oʻrtasidagi hamkorlik va ishonch munosabatlarini yanada mustahkamlashga xizmat qilmoqda.
Qoraqalpogʻiston Respublikasi IIV Axborot xizmati