Namangan viloyati IIB rahbariyatining navbatdagi oʻrganishlari Uychi tumanida olib borildi
2025-11-25 10:55:00 / Yangiliklar
Shu doirada Uychi tumanida oʻtkazilgan navbatdagi oʻrganish jarayonlarida dastlab “Jiydakapa” mahallasida joylashgan elektron kuzatuv maskani faoliyati oʻrganildi. Mazkur maskan orqali mahalla hududida jamoat xavfsizligini taʼminlashga xizmat qilayotgan kuzatuv tizimlarining ish holati koʻzdan kechirildi.
Shuningdek, Namangan shahrining katta qismini, shuningdek Uychi va Namangan tumanlari hududlarini ichimlik suvi bilan taʼminlayotgan “Jiydakapa” suv inshootining xavfsizlik choralari oʻrganilib, obyektning muhofaza darajasi va kecha-yu kunduz navbatchilik tartibi bilan tanishildi.
Oʻrganish davomida Andijon va Namangan viloyatlarini bogʻlovchi yoʻldagi YPX maskani faoliyati ham koʻzdan kechirilib, yoʻl patrul xizmati va Karantin tadbirlarini taʼminlash guruhi xodimlariga yoʻllarda harakat xavfsizligini taʼminlash, viloyat hududiga kirib kelayotgan yuk va yoʻlovchi transportlarini qonunchilik talablariga muvofiq nazorat qilish boʻyicha zarur koʻrsatmalar berildi.
Bundan tashqari, “Qumtepa” mahallasi profilaktika inspektorlarining faoliyati oʻrganildi. Ularga PQ-1 va PQ-253-son qarorlar ijrosini taʼminlash, manzilli profilaktika tadbirlarini tashkil etish, fuqarolarning murojaatlari bilan ishlash va ularni oʻz vaqtida ijobiy hal etish boʻyicha aniq vazifalar yuklatildi.
Shu bilan birga, tuman boʻylab xizmat olib borayotgan tungi naryadlarga yoʻriqnoma oʻtkazilib, xodimlarga xizmat intizomi, belgilangan vazifalariga qatʼiy amal qilish, jamoat xavfsizligini taʼminlash va jinoyatchilikning oldini olish boʻyicha qoʻshimcha topshiriqlar berildi.
Mazkur yoʻnalishdagi oʻrganishlar viloyatning boshqa hududlarida ham izchil davom ettirilmoqda.
Namangan viloyati IIB Axborot xizmati