O‘zbеkiston Rеspublikаsi Ichki ishlаr vаzirligi

Taʼlim muassasasi vakillari dastlab Urganch shahridagi “Mustaqillik” mahallasida boʻldi. Masʼullar, mahalla raisi boshchiligidagi “yettilik” aʼzolari bilan uchrashuvda jinoyatchilikni jilovlash borasida amalga oshirilayotgan ishlar muhokama qilindi.

Akademiya boshligʻi davlatimiz rahbarining joriy yil 18-avgustdagi PQ-253-son qaroridagi vazifalar, “Yoʻl xarita”larda belgilab olingan chora-tadbirlar ijrosi bilan tanishdi. Maʼlum boʻlishicha, shu kungacha mahalla hududida 28 ta “jinoyat oʻchogʻi” aniqlangan. Huquqbuzarliklarning barvaqt oldini olish maqsadida joylarga 29 ta zamonaviy kamera, 19 ta tashvish tugmasi oʻrnatilib, 96 ta obyekt texnik qoʻriqlovga olingan.

Muloqot chogʻida “yettilik” vakillariga jinoyatchilikning sabab va sharoitlarini bartaraf etish, aholining bandligini oshirish, kambagʻallikni qisqartirish, yoshlar bilan maqsadli ishlash, maishiy-turmush doirasidagi huquqbuzarliklarning oldini olish, shuningdek xavfsiz uy va koʻchalarni tashkil etish, hududlarni kameralashtirish, texnik va jismoniy qoʻriqlovga olishni jadallashtirish yuzasidan tavsiyalar berildi.

Yangiariq tumanidagi “Yangiobod” mahallasi ham “sariq” toifaga kiritilgan. Mahalla hududida oʻgʻirlik va boshqa oldini olish mumkin boʻlgan jinoyatlar qayd etilgan. Ular oilalardagi nosogʻlom muhit, ijtimoiy profilaktikaning yetarli darajada tashkil etilmagani natijasida kelib chiqqan.

Akademiya boshligʻi mazkur mahalla faollari bilan uchrashuvda har bir xonadan, koʻcha va hududda xavfsiz muhit yaratish uchun aholi, ayniqsa yoshlarning huquqiy madaniyatini oshirish, profilaktik ishlar taʼsirchanligini oshirish, kriminogen vaziyatga salbiy taʼsir koʻrsatayotgan omillarni oʻz vaqtida bartaraf etish zarurligini taʼkidladi. “Muhimi, yangi tizim asosida amalga oshirilayotgan ishlarimiz oʻz samarasini koʻrsatishi, mahallalar jinoyatdan mutlaqo xoli boʻlishi kerak”, — dedi akademiya boshligʻi.

Hududlarni oʻrganish jarayonida viloyat Ichki ishlar boshqarmasida masʼul rahbarlar va yosh xodimlar ishtirokida uchrashuv tashkil qilindi. Yigʻilishda taʼlim muassasasi bitiruvchilarining ish boshlagan paytdan bugungacha boʻlgan 3-yillik faoliyati, kasbiy kompetensiyalari tahlil qilindi.

“Hozirgi davrda ichki ishlar organlari faoliyatiga, tizim xodimlariga talab kuchayib bormoqda. Sizlar muntazam oʻz ustingizda ishlab, bilim salohiyat va professional mahoratingizni oshirib borishingiz lozim. Yuqori malakali kadrlar tayyorlashga qaratilgan islohotlarimiz natijasi sizlarga bogʻliq”, — dedi akademiya boshligʻi.

Uchrashuvda sohaviy xizmat rahbarlari va yosh kadrlarning fikr-mulohazalari, takliflari tinglandi. Taʼlim sifatini yanada oshirish, xodimlar faoliyatidagi muammolarni oʻrganish maqsadida soʻrovnoma oʻtkazildi.

Xizmat safari davomida IIV akademik litseyida olib borilayotgan taʼlim jarayonlari bilan tanishildi. Oʻqituvchi va murabbiylarga yosh avlodning kasbiy fazilatlarini yuksaltirish, oʻqitishning ilgʻor yondashuvlarini joriy qilish, kadrlarni maqsadli tayyorlash yuzasidan tavsiyalar berildi. Oʻquvchilar ishtirokida oʻtkazilgan uchrashuvda akademiya faoliyatiga oid videorolik namoyish qilinib, kelajak maqsadlari yoʻlida aʼlo baholarga oʻqiyotgan oʻgʻil-qizlarga tashakkurnoma berildi.

IIV akademiyasi Axborot xizmati