Oʻzbekiston Respublikasi Ichki ishlar vazirligi va Belorusiya Respublikasi Tergov qoʻmitasi oʻrtasida Axborot almashish va oʻzaro yordam masalalari boʻyicha anglashuv memorandumi imzolandi
2025-11-20 22:00:00 / Yangiliklar
Tashrif davomida 3 ta katta tadbirlar tashkillashtirildi.
Xususan tashrifning ilk kunida Belorusiya Respublikasi Tergov qoʻmitasi va Oʻzbekiston Respublikasi Ichki ishlar vazirligi oʻrtasida Axborot almashish va oʻzaro yordam masalalari boʻyicha anglashuv memorandumi imzolandi.
Memorandum doirasida ishtirokchilar oʻz vakolatiga oid Milliy qonunlar va oʻz davlatlarining xalqaro majburiyatlariga muvofiq harakat qilib, axborot texnologiyalari sohasidagi va boshqa turdagi jinoyatlarning oldini olish hamda ularga qarshi kurashish maqsadida hamkorlik qilishi belgilandi.
12-noyabr kuni Tashrif dasturiga muvofiq, delegatsiya aʼzolari Ichki ishlar vazirining oʻrinbosari, Belorusiya Respublikasi Tergov qoʻmitasi raisi, Qozogʻiston Respublikasi Ichki ishlar vazirining oʻrinbosari, Rossiya Federatsiyasi Ichki ishlar vazirining oʻrinbosarlari ishtirokida ishchi uchrashuv oʻtkazildi.
Uchrashuvda jinoyatchilikka qarshi kurashish, tergov ishlarini takomillashtirish, ilm-fan va texnika yutuqlarini, shuningdek, dastlabki tergovni tashkil etishning ilgʻor shakllari va usullarini amaliyotga joriy etish maqsadida Belarus Respublikasi Tergov qoʻmitasi, Rossiya Federatsiyasi, Qozogʻiston va Oʻzbekiston Respublikalari Ichki ishlar vazirliklari hamdoʻstlikka aʼzo davlatlar hududida aniq jinoyat ishlari boʻyicha qoʻshma tergov-operativ guruhlarini tuzish amaliyotini kengaytirish hamda oʻzaro bogʻliq jinoyatlarni tergov qilishda muvofiqlashtirilgan harakatlarni amalga oshirish haqida Bayonot qabul qilindi.
Tashrifning soʻnggi kunida “Kiberjinoyatchilikka qarshi kurashish kontekstida milliy xavfsizlik tizimini takomillashtirishning asosiy yoʻnalishlari” mavzusida xalqaro ilmiy-amaliy konferensiyada delegatsiya aʼzolari ishtirok etishdilar.
Shuningdek Belorusiya Respublikasi Tergov qoʻmitasi va Oʻzbekiston Respublikasi IIV oʻrtasida tuzilgan memorandum hamda Rossiya Federatsiyasi, Belorusiya, Qozogʻiston va Oʻzbekiston Respublikalari delegatsiyalari aʼzolari ishtirokida imzolangan bayonot asosida belgilangan chora-tadbirlar oʻzaro hamkorlikda amalga oshirilishi belgilab olindi.