Oʻzbekiston Respublikasi Kriminologiya tadqiqot instituti hamda Qatar Davlati IIV Politsiya Akademiyasi huzuridagi Xavfsizlik ilmiy-tadqiqotlar markazi oʻrtasida manfaatli muzokaralar oʻtkazildi
2025-11-20 10:00:00 / Yangiliklar
Uchrashuvda delegatsiya vakillari sifatida – Qatar IIV Politsiya Akademiyasi huzuridagi Xavfsizlik ilmiy-tadqiqotlar markazi rahbari Jassim Muhammad Al-Obaidli, Qatar IIV Iqtisodiy va elektron jinoyatlar departamenti direktorining oʻrinbosari Muhammad Al Tani, Qatar IIV Xalqaro hamkorlik departamenti vakili Muhammad Al-Naama, Qatar IIV Jinoyat-qidiruv departamenti vakili Muhammad Al-Mannai hamda Qatar davlatining Oʻzbekistondagi elchisi Hasan Hamza Hoshim ishtirok etdilar.
Uchrashuv avvalida delegatsiya vakillari tomonidan joriy yil 17-18-noyabr kunlari Samarqand shahrida muvaffaqiyatli tashkil etilgan “Jahon kriminologiyasining ilgʻor tajribalari” nomli ikkinchi xalqaro forum natijalari yuksak baholanib, tadbirga Qatar delegatsiyasi vakillari taklif etilganligi uchun minnatdorlik bildirildi.
Muzokaralar davomida Qatar va Oʻzbekistonning jinoyatchilikka qarshi kurashish va uni oldini olish borasidagi ilmiy va amaliy tajribalarni oʻzaro almashish, Jinoyatchilikni chuqur tadqiq etishga qaratilgan qoʻshma ilmiy amaliy tadqiqot loyihalarni amalga oshirish, Kriminologiya tadqiqot instituti xodimlarini Qatar IIV huzuridagi ilmiy-tadqiqot muassasalarida ilmiy stajirovka oʻtashlarini yoʻlga qoʻyish, Kriminologiya, jinoyatchilikni oldini olish sohasidagi ilmiy maqola va tezislarni hamkor mamlakatlarning ilmiy nashrlarida chop ettirish kabi muhim yoʻnalishdagi masalalar muhokama qilindi.
Shuningdek Oʻzbekistonda Qatar davlatining jinoyatchilikni barvaqt oldini olish hamda kriminologik faoliyatni rivojlantirish borasidagi tajribasini muntazam oʻrganish va ilgʻor tajribalarni joriy etishga qaratilgan “Qatar kriminologiyasini tadqiq qilish ofisi”ni tashkil etish masalasi xam koʻrib chiqildi.
Qolaversa, tomonlar ikki tomonlama memorandum imzolash masalasini kun tartibiga kiritish, ushbu memorandum loyihasini ishlab chiqib yuborish hamda unga hamkorlikning ustuvor yoʻnalishlariga doir muhim masalalarni kiritish boʻyicha xam kelishib oldilar.
Uchrashuv yakunida tomonlar kelgusida yaqin hamkorlikni yanada rivojlantirish, tajriba almashish va qoʻshma tashabbuslarni qoʻllab-quvvatlashga tayyor ekanliklarini bildirdilar.