IIV Akademiyasi boshligʻi Shayxontohur tumani IIO FMBda tashkil etilayotgan amaliyot jarayonlari bilan tanishdi
2025-11-19 16:40:00 / Yangiliklar
Maʼlumki, joriy oʻquv yilidan Akademiyada ham dual formatda kadrlar tayyorlash yoʻlga qoʻyildi. Hafta davomida poytaxt ichki ishlar organlarida tashkil etilayotgan amaliyotlar kursantlarni tanlagan ixtisosligining yetuk malakali mutaxassisi boʻlishida puxta zamin yaratmoqda.
Akademiya boshligʻi amaliyot mashgʻulotlari bilan tanishish chogʻida masʼullar bilan suhbatlashdi. Ayrim xodimlar kundalik faoliyati davomida turli holatlarga, ayniqsa fuqarolar va OAV vakillari bilan muloqot qilishda muammolarga duch kelayotgani, shundan kelib chiqib kursantlar bilan ishlashda ularning nostandart sharoitlarda tezkor va toʻgʻri qaror qabul qilish koʻnikmalarini shakllantirishga alohida eʼtibor qaratish zarurligini taʼkidladi.
“Bugungi kunda jinoyatchilikning yangi koʻrinishlari paydo boʻlmoqda. Amaliyot faqat nazariy bilimlarni mustahkamlash bilan cheklanib qolmasligi, kursantlarimiz hududlarning kriminogen vaziyati bilan yaqindan tanishib, jinoyatchilikka qarshi kurashishda qoʻllanilayotgan ilgʻor yondashuvlarni oʻrganib borishi kerak”, - dedi Akademiya boshligʻi.
Shu kuni masʼullar va murabbiylarga tavsiyalar berilib, yangi tizim asosida taʼlim sifatini yanada oshirish yuzasidan vazifalar belgilab olindi.
IIV Akademiyasi Axborot xizmati