O‘zbеkiston Rеspublikаsi Ichki ishlаr vаzirligi

Bu mavzuda Ichki ishlar vazirining oʻrinbosari, general mayor Davron Nazarmuhammedov soʻzga chiqdi. Notiq burch va vazifalarga masʼuliyatsizlik bilan yondashish, korrupsiya, muomala madaniyatiga amal qilmaslik, mansab vakolatini suiisteʼmol qilish kabi salbiy holatlar uchrayotganini afsus bilan taʼkidladi.

Yigʻilishda shaxsiy tarkibda sogʻlom muhitni shakllantirish, tartib-intizomni mustahkamlash, yosh xodimlarni tarbiyalash, faoliyatida kamchiliklar kuzatilayotgan soha vakillari ustidan nazoratni kuchaytirish choralarini koʻrishga oid tavsiyalar bildirildi. Ushbu jarayonda namunali faoliyat yuritayotgan, korrupsion omillarni bartaraf etishda tashabbus koʻrsatib, pora taklif qilgan shaxslar haqida xabar bergan xodimlarga minnatdorchilik bildirildi. Taʼkidlash joiz, oʻtgan oʻn oy davomida Jizzax viloyatida 18 ta holatda xodimlarga pora taklif qilgan shaxslar aniqlanib, chora koʻrilgan.

Biroq Jizzax viloyati ichki ishlar organlari safida ham xizmat vazifasiga panja ortidan qarab, belgilangan vazifalarni bajarishda sustkashliklarga yoʻl qoʻyayotganlar, qonunga zid xatti-harakatlarga qoʻl urayotganlar borligi ham taʼkidlandi. Jumladan, joriy yilning oʻtgan davrida soha vakillarining 195 nafariga intizomiy choralar koʻrilgan. 3 nafari esa jinoiy javobgarlikka tortilgan. Mazkur holat xizmat intizomi va qonunchilik buzilishining oldini olish choralarini kuchaytirish, korrupsion omillarni bartaraf etishga qaratilgan choralar, tezkor va profilaktik tadbirlarni kuchaytirilishiga sabab boʻlishi bildirildi.

Chunonchi, ichki ishlar organlari tizimini mansab vakolatidan foydalanib, korrupsiyaga yoʻl qoʻyayotgan nopok kimsalardan tozalash maqsadida muntazam nazorat tadbirlari oʻtkazilmoqda. Xuddi shunday, xizmat intizomi va qonunchilik buzilishini favqulodda holat sifatida baholab, keskin choralar koʻrish va shaxsiy tarkib oʻrtasida muhokamalar oʻtkazish belgilab olindi.

Yigʻilishda viloyat ichki ishlar boshqarmasi boshligʻi hamda bir qator masʼullar soʻzga chiqdi. Bu jarayonda intizomiy kengash faoliyatini jonlantirish, aholi eʼtiroziga sabab boʻluvchi omillarni bartaraf qilish masalalari koʻrib chiqildi. Yakunda xizmat intizomi va qonunchilik buzilishining oldini olishga qaratilgan chora-tadbirlar belgilab olindi.