IIV Akademiyasida Oʻzbekiston xalq artisti, atoqli rejissyor Bahodir Yoʻldoshev tavalludining 80-yilligiga bagʻishlab “Tafakkurdan mavjlangan yurak” mavzuida maʼrifiy tadbir oʻtkazildi
2025-11-19 00:40:00 / Yangiliklar
Teatr va kino arboblari, yosh ijodkorlar, taʼlim muassasasi professor-oʻqituvchilari va kursantlari ishtirokida oʻtgan tadbirda buyuk isteʼdod sohibining umr yoʻli, milliy sanʼatimiz rivojiga qoʻshgan beqiyos xizmatlari, ibratli fazilatlari eʼtirof etildi.
– Bahodir Yoʻldoshev butun umrini teatrga bagʻishlagan zabardast inson edi. U kishi bilan ishlash gʻoyat maroqli, shu bilan birga katta masʼuliyatni talab etardi. Oʻz kasbini sevmagan, qadrlamagan odam Bahodir aka bilan ishlay olmasdi. “Xiyonatlar ichida eng ogʻiri kasbga qilingan xiyonat deb bilaman... Spektakl qoʻyayotganimda tomoshabin olqishlarini oʻylamaslikka harakat qilaman, muhimi, tomoshabin menga hamdard boʻlsa...” derdi. Bahodir aka umrining oxiriga qadar xalqimizga halol va fidoyilik bilan xizmat qildi. Boy bilimi, mahorati va tajribasini yoshlarga oʻrgatib, ularning isteʼdodini roʻyobga chiqarishga ulkan hissa qoʻshdi. Bahodir Yoʻldoshev sahnalashtirgan spektakllar milliy madaniyatimizning oltin fondi sifatida xalqimiz, sanʼat muxlislari qalbidan chuqur joy oldi”, — dedi Oʻzbekiston xalq artisti Elyor Nosirov.
Tadbir doirasida “Diydor” yoshlar teatr-studiyasi tomonidan “Maysaraning ishi” spektakli namoyish qilindi. Koʻp yillardan buyon teatr sahnasidan tushmay kelayotgan asar tomoshabinlarga koʻtarinki kayfiyat va maʼnaviy hordiq ulashdi.
IIV Akademiyasi Axborot xizmati