O‘zbеkiston Rеspublikаsi Ichki ishlаr vаzirligi

Forumni Oʻzbekiston Respublikasi IIV vaziri oʻrinbosari, polkovnik Ashropov Ramazon Axmatxoʻjayevich, vazir nomidan ochib berdi.

Mazkur forum Oʻzbekiston Respublikasi Prezidentining “Kriminologiya sohasida ilmiy-amaliy tadqiqot ishlarini tashkil etish chora-tadbirlari toʻgʻrisida”gi 2024-yil 15-yanvardagi PQ–22-son qaroriga muvofiq oʻtkazilmoqda.

Forumda Vengriya, Qatar, Hindiston, Xitoy, Belarus, Rossiya, Qozogʻiston, Turkiya, Tojikiston va Qirgʻiziston mamlakatlarining politsiya idoralari va kriminologik tadqiqot tuzilmalari rahbarlari, shuningdek, qator nufuzli xalqaro tashkilotlar ishtirok etmoqda, jumladan:

• UNODC — BMTning Jinoyat va narkotiklar boʻyicha Markaziy Osiyo mintaqaviy boshqarmasi;

• TIKA — Turkiya Hamkorlik va taraqqiyot agentligi;

• GIZ — Germaniya xalqaro hamkorlik jamiyati.

Shu bilan birga, tadbirda Rossiya Federatsiyasi IIVning Oʻzbekistondagi vakolatxonasi rahbarlari ham ishtirok etib, huquq-tartibot sohasidagi hamkorlik masalalari muhokama qilinmoqda.

Forum qatnashchilariga IIV tomonidan Samarqand shahridagi “Mahalla yettiligi” ish faoliyati tanishtirish, IIVning turizm xavfsizligini taʼminlash hamda kiberjinoyatlarga qarshi kurashish boʻlinmalari ish faoliyati ham tanishtiriladi.

Forumning eng muhim natijalaridan biri sifatida qator davlatlar politsiya va tadqiqot tuzilmalari bilan hamkorlikni tubdan kuchaytirishga qaratilgan hujjatlar tayyorlanmoqda.

Xususan, Vengriya, Hindiston, Rossiya, Qatar, Turkiya, Xitoy, Belarus, Qozogʻiston, Tojikiston va Qirgʻiziston politsiya idoralari va kriminologiya sohasidagi tadqiqot tashkilotlari bilan quyidagi sohalar boʻyicha kelishuvlar rejalashtirilgan:

• xalqaro hamkorlik protokollarini imzolash;

• jinoyatchilikni chuqur va kompleks oʻrganishga qaratilgan qoʻshma tadqiqotlar;

• mintaqalar boʻyicha tahdidlarni baholash va xorijdan kirib kelishi mumkin boʻlgan jinoyatlar yuzasidan qoʻshma protokollar;

• ekspertlarni oʻqitish, ilmiy-tadqiqot dasturlari va axborot almashinuvini yoʻlga qoʻyish.

TIKA bilan grant va texnik koʻmak boʻyicha kelishuvlar:

Forum doirasida TIKA bilan alohida uchrashuvlar oʻtkazilib, Turkiya tomonidan:

• Oʻzbekiston Respublikasi Kriminologiya tadqiqot instituti faoliyatini qoʻllab-quvvatlash uchun grant mablagʻlarini jalb qilish;

• institut infratuzilmasini takomillashtirish;

• zamonaviy kriminologik laboratoriya va tahlil texnologiyalarini joriy etish;

• qoʻshma oʻquv dasturlari va seminarlarni moliyalashtirish yuzasidan kelishuvlar muhokama qilinmoqda.

Shu bilan birga, ikki tomonlama xalqaro hamkorlik oʻrnatish borasida:

- Rossiya Federatsiyasi Ichki ishlar vazirligining Butunrossiya ilmiy-tadqiqot instituti federal davlat muassasasi;

- Rossiya Federatsiyasi Ural davlat yuridik universiteti;

- Vengriyaning “Ludovika” Davlat xizmati universiteti Huquqni muhofaza qiluvchi organlar fakulteti;

- Turkiya Milliy Politsiya Akademiyalari bilan memorandum imzolanishi kutilmoqda.

Shuningdek, Qatar Amirligi bilan xodimlar stajirovkasi, Qatar va Oʻzbekiston jinoyatchiligini oʻzaro tadqiq qilish qoʻshma loyihalari ishga tushirish masalasi kun tartibiga kiritilgan.

Forum yakunida jinoyatchilikni oldini olish va tadqiq qilishda Hindiston, Vengriya, Xitoy, Belarus, Rossiya, Qozogʻiston, Qirgʻiziston, Tojikiston davlatlari politsiyasi hamda tadqiqot tashkilotlari bilan xalqaro qoʻshma loyihalar ishga tushirilishi rejalashtirilmoqda.

Ushbu tashabbuslar kelgusida kriminologik tadqiqotlarning ilmiy va amaliy samaradorligini yanada oshirishga xizmat qiladi.

Samarqandda oʻtkazilgan mazkur forum jinoyatchilikka qarshi global kurashda xalqaro hamkorlikning yangi bosqichini boshlab bermoqda.

Tadbir ilmiy amaliyot, ekspertlar tajribasi va amaliy hamkorlikning birlashgan platformasi sifatida yuksak baholanmoqda.

Forum davom etmoqda.

IIV huzuridagi Oʻzbekiston Respublikasi Kriminologiya tadqiqot instituti