Namangan viloyatida axborot texnologiyalari yoʻnalishida faoliyat olib borayotgan yoshlar bilan uchrashuv oʻtkazildi
2025-11-16 10:40:00 / Yangiliklar
Namangan davlat universitetining Yangi Namangan shaharchasida joylashgan yangi binosida tashkil etilgan navbatdagi “Hokim va yoshlar” uchrashuvi IT sohada erishilayotgan yutuqlar, kibermadaniyatni shakllantirish va uning targʻiboti hamda kelgusidagi vazifalar muhokamasiga bagʻishlandi.
Uchrashuv davomida axborot texnologiyalari yoʻnalishida oʻqiyotgan talabalar, oʻquv markazlarida faoliyat yuritayotgan yosh mutaxassislar, oliy taʼlim muassasalarining mustaqil tadqiqotchilari IT sohasini rivojlantirish, sunʼiy intellekt, raqamlashtirish boʻyicha oʻz loyihalari, gʻoyalari va ilmiy izlanishlari yuzasidan fikr-mulohazalarini bildirdilar.
Muloqot davomida yoshlar tomonidan bildirilgan murojaatlarning aksariyatiga shu yerning oʻzida yechim topildi. Muddat talab etadigan masalalar esa soha rahbarlariga tegishliligi boʻyicha koʻrib chiqish va hal etish uchun topshirildi.
Shuningdek, viloyat IIB Axborot texnologiyalari sohasidagi jinoyatlarga qarshi kurashish boshqarmasi boshligʻi tomonidan hozirgi kunda keng tarqalayotgan kiberfiribgarlik turlari, ularning amalga oshirilish mexanizmlari, ulardan himoyalanishning amaliy yoʻllari, shuningdek, aholida kibermadaniyatni shakllantirish hamda mazkur yoʻnalishda targʻibot-profilaktika ishlarini yanada kuchaytirish zarurati yuzasidan batafsil tushuntirishlar berildi.
Maʼlumot uchun, viloyatda soʻnggi besh yil davomida IT yoʻnalishida 12 ta markaz faoliyati yoʻlga qoʻyildi, Namangan shahrida IT Parkning Namangan filiali tashkil etildi. Shuningdek, “Bir million dasturchi” loyihasi doirasida viloyatda 480 ming nafar yoshlar oʻqitildi.
Namangan viloyati IIB Axborot xizmati