Buxoro viloyati Vobkent tumanida otaliqqa olingan yoshlar bilan uchrashuv oʻtkazildi
2025-11-15 13:45:00 / Yangiliklar
Vobkent tumanida yoshlarni qoʻllab-quvvatlash, ularning hayotda faol oʻrin egallashi va mavjud muammolarini oʻz vaqtida hal etish maqsadida navbatdagi “Rahbar va yoshlar” uchrashuvi oʻtkazildi.
Tadbirda tuman hokimi, tuman prokurori, tuman IIB boshligʻi hamda tuman soliq inspeksiyasi boshligʻi ishtirok etib, otaliqqa olingan yoshlar bilan yuzma-yuz muloqot olib bordilar.
Uchrashuv davomida yoshlarga yaratilayotgan imkoniyatlar, ularning bandligi, tadbirkorlik tashabbuslari, taʼlim va kasbga yoʻnaltirish masalalari atroflicha muhokama qilindi.
Ushbu jarayonda otaliqqa olingan yoshlarning muammolari, taklif va ehtiyojlari tinglanib, ularga amaliy yordam koʻrsatish hamda har bir murojaatni alohida nazoratga olish boʻyicha masʼullarga tegishli topshiriqlar berildi.
Tadbir yakunida rahbarlar yoshlar bilan muntazam uchrashuvlar oʻtkazish, ularni qoʻllab-quvvatlash va har bir yoshning kelajagini mustahkamlashga qaratilgan ishlarni davom ettirishini taʼkidladilar.
Buxoro viloyati IIB Axborot xizmati