Namangan viloyatida aholi osoyishtaligini taʼminlash maqsadida tungi xizmat faoliyati kuchaytirilmoqda
2025-11-13 11:30:00 / Yangiliklar
Shu doirada Namangan shahri, Yangi Namangan va Davlatobod tumanlari ichki ishlar boʻlimlari shaxsiy tarkibi bilan hamkorlikda jamoat xavfsizligini taʼminlash boʻyicha kechki va tungi navbatchiliklar tashkil etilmoqda.
Boshqarma rahbariyati tomonidan mazkur hududlarda xizmatga jalb etilgan xodimlar uchun xizmat oldi yoʻriqnomalari oʻtkazilib, ularga shaxsiy xavfsizlik va xizmat intizomiga qatʼiy amal qilish, aholi tinchligi va jamoat xavfsizligini taʼminlash, shuningdek, yoʻl-transport hodisalarining oldini olish boʻyicha aniq topshiriqlar berildi.
Bundan tashqari, Jamoat tartibini saqlash boshqarmasi hamda viloyat kuz–qish ishchi guruhi faoliyati oʻrganilib, aholidan kelib tushayotgan murojaatlar yuzasidan tezkor choralar koʻrish, mavsumiy holatni tahlil qilish va muammolarni bartaraf etish boʻyicha koʻrsatmalar berildi.
Shuningdek, Yangi Namangan tumanida oʻtkazilgan navbatdagi oʻrganish ishlari doirasida ichki ishlar boʻlimi xodimlarining tungi faoliyati va ijtimoiy soha obyektlaridagi xizmat holati tahlil qilindi. “Guliston”, “Beruniy”, “Furqat”, “Maʼnaviyat” va “Mingchinor” mahallalarida xizmat borayotgan xodimlar bilan uchrashuv oʻtkazilib, aholi osoyishtaligini taʼminlash, harakat xavfsizligini mustahkamlash hamda huquqbuzarliklarning oldini olish boʻyicha vazifalar belgilab berildi.
Shuningdek, “Guliston” mahallasi profilaktika inspektorlari va xizmatga jalb etilgan xodimlarning faoliyati oʻrganilib, jinoyatchilikni oldini olishdagi ishlar tahlil qilindi. Aniqlangan kamchiliklar boʻyicha tegishli koʻrsatmalar berilib, masʼuliyatli vazifalar yuklatildi.
Bundan tashqari, tuman elektr taʼminoti korxonasining kuz–qish mavsumiga tayyorgarlik jarayoni ham koʻzdan kechirildi. Omborlardagi mavjud zaxira va ehtiyot qismlar holati oʻrganilib, mutaxassislarga mavsumni betalofat oʻtkazish, energetik xavfsizlikni taʼminlash va favqulodda holatlarga shay boʻlish boʻyicha koʻrsatmalar berildi.
Mazkur tadbirlar natijasida tuman va shaharlar miqyosida jamoat xavfsizligini taʼminlash, xizmat intizomini mustahkamlash hamda aholi osoyishtaligini yanada yuqori darajada taʼminlash koʻzda tutilgan.
Namangan viloyati IIB Axborot xizmati