O‘zbеkiston Rеspublikаsi Ichki ishlаr vаzirligi

Aytish joizki, ikki haftalik oʻquv kursi doirasida taʼlim muassasalari oʻrtasida oʻzaro hamkorlik va tajriba almashinuvini mustahkamlashga qaratilgan qator tadbirlar amalga oshirildi.

Mashgʻulotlar davomida mehmonlar yurtimizning qadimiy va boy tarixi, yangi Oʻzbekistondagi keng qamrovli oʻzgarishlar, muhtaram Prezidentimiz tomonidan olib borilayotgan strategik islohotlar, shuningdek mamlakatimiz ichki ishlar organlari tizimi, soha uchun kadrlar tayyorlash jarayonlari haqida keng tushunchaga ega boʻlishdi.

Ayniqsa joylarda tashkil qilingan sayyor mashgʻulotlar ichki ishlar organlarining jamoat tartibini saqlash, jinoyatchilikka qarshi kurashish, xavfsiz turizmni taʼminlash faoliyatiga joriy qilingan ilgʻor yondashuvlar bilan yaqindan tanishish imkonini berdi.

Oʻquv kursi yakuni munosabati bilan oʻtkazilgan tadbirda universitet delegatsiyasi rahbari Xu Meng yurtimiz haqidagi taassurotlarini boʻlishib, shunday dedi:

“Tashrif chogʻida Oʻzbekistonda amalga oshirilayotgan ulkan islohotlarga guvoh boʻldik. Akademiyada yoʻlga qoʻyilgan innovatsion taʼlim jarayonlari bilan tanishish, qiziqarli maʼruzalarni tinglash, yetuk salohiyatli professor-oʻqituvchilar bilan fikr almashish biz uchun juda foydali boʻldi. Muhimi, bir jihatga, taʼlim muassasalarimiz oʻrtasidagi aloqalar izchil ravnaq topib borayotganiga amin boʻldik”.

Akademiya rahbari Oʻzbekiston va Xitoy mamlakatlarini tarix sinovidan oʻtgan aloqalar bogʻlab turishini alohida taʼkidladi. “Keyingi yillarda munosabatlarimiz strategik sheriklik darajasiga koʻtarildi. Manfaatli aloqalar koʻplab sohalar qatori, huquqni muhofaza qilish tizimida ham jadal rivojlandi. Bugun buning amaliy ifodasini koʻrib turibmiz. Oʻylaymanki, ayni jihatlar hamkorligimizni yangi zamon ruhi bilan yanada mustahkamlashga xizmat qiladi”, – dedi Rustam Xatamov.

Shundan soʻng universitet professor-oʻqituvchilari va talabalariga sertifikatlar topshirildi.

IIV akademiyasi Axborot xizmati