Ichki ishlar vazirligida Tibbiyot xodimlari kuniga bagʻishlangan tantanali tadbir boʻlib oʻtdi: fidoyi shifokor va hamshiralar xizmatlari yuksak baholandi
2025-11-08 19:00:00 / Yangiliklar
Har yili yurtimizda noyabr oyining ikkinchi yakshanbasi tibbiyot xodimlari kuni sifatida keng nishonlanadi.
Ichki ishlar vazirligi tibbiyot boʻlinmalarida ham xodimlarning jismoniy va ruhiy tetiklik bilan xizmat oʻtashlari uchun, ularning salomatliklarini nazorat qiluvchi, davolovchi, har tomonlama koʻmak beruvchi shifokor va hamshiralar faoliyat olib borishadi.
Vazirlik madaniyat saroyida tashkil etilgan bayram tadbirida ularning bir guruhi tantanali tarzda taqdirlandi.
Dastlab bayram munosabati Ichki ishlar vazirining tibbiyot xodimlariga yoʻllagan tabrigi oʻqib eshittirildi.
Tizimda tibbiy profilaktika ishlari jadal olib borilayotganligi natijasida xodimlarning turli kasalliklarga chalinishi keskin kamayganligi eʼtirof etildi.
Bu albatta oq libosli salomatlik posbonlarining, shifokor va hamshiralarning fidokorona mehnatlari samarasi ekanligi taʼkidlandi.
Hozirda vazirlikning barcha hududiy boʻlinmalarida davolash profilaktika muassasalari faoliyat olib bormoqda. Joriy yilda Buxoro viloyati va Toshkent shahridagi Tibbiyot boʻlimlari uchun binolar qurilib, foydalanishga topshirilgan boʻlsa Jizzax viloyatida yangi loyihalar ustida ish olib borilmoqda.
Bayram munosabati bilan Ichki ishlar vazirining tegishli buyrugʻiga koʻra koʻplab xodimlar mukofotlandi. Tadbir davomida shuningdek hamkor tashkilotlar masʼullari tomonidan yuzdan ortiq tibbiyot xodimlariga mukofotlar topshirildi.
Taqdirlash marosimidan soʻng bayram dasturi Ichki ishlar vazirligi madaniyat saroyi sanʼatkorlari ijrosidagi taronalar bilan davom etdi. Kuy-qoʻshiqlarda tibbiyot xodimlarining fidokorona xizmatlari, ularning sharafli faoliyati madh etildi.
Bu kabi tadbirlar hududiy ichki ishlar organlarida ham davom etmoqda.