IIV Akademiyasida rahbar kadrlar salohiyatini oshirishga qaratilgan davra suhbati oʻtkazildi
2025-11-08 09:00:00 / Yangiliklar
Ichki ishlar organlari faoliyatini samarali tashkil etish rahbar kadrlarning bilim va tajribasi, boshqaruv mahoratiga bogʻliq.
Ayniqsa bugungi islohotlar tizimdagi barcha boʻgʻin rahbarlardan yuqori masʼuliyatni talab etmoqda.
IIV Akademiyasi magistraturasida tinglovchilar va professor-oʻqituvchilar ishtirokida oʻtkazilgan davra suhbati ana shu dolzarb masalalarga bagʻishlandi.
Tadbirda vazirlik Tashkiliy departamenti boshligʻining birinchi oʻrinbosari, podpolkovnik Jasur Yusupov soʻz olib, ichki ishlar tizimidagi keng koʻlamli islohotlar, amaliyotga tatbiq etilayotgan zamonaviy yondashuvlar, faoliyat samaradorligini oshirishning asosiy omillari, bu oʻrinda rahbar kadrlarning oʻrni haqida batafsil toʻxtaldi.
Keyingi yillarda ichki ishlar organlarida boshqaruvning samarali mexanizmlari joriy qilinib, rahbar kadrlar tayyorlash tizimi tubdan takomillashtirilgani, sohadagi oʻzgarishlarning amaliy natijasi koʻp jihatdan zamonaviy bilim va boshqaruv koʻnikmalarini egallagan rahbarlar zimmasida ekanligi aytib oʻtildi.
Davra suhbatida vazirlik ishchi guruhi tomonidan hududlarda oʻtkazilayotgan kompleks tekshiruvlar davomida aniqlanayotgan kamchiliklar tahlil qilindi.
Ayrim rahbarlarda masʼuliyat va shaxsiy javobgarlik hissi yetishmasligi, bu kabi omillar fuqarolarning ichki ishlar organlariga boʻlgan ishonchiga salbiy taʼsir koʻrsatayotgani taʼkidlandi.
Shuningdek, tinglovchilar bilan Tashkiliy departament boshligʻi oʻrinbosari, polkovnik Sherzod Gʻaniyev ham muloqot qilib, murojaatlar bilan ishlash, axborot-tahlil faoliyati hamda ijrochilik intizomi masalalariga toʻxtaldi. Tadbir davomida tinglovchilar oʻzlarini qiziqtirgan savollarga javob oldi.
IIV Akademiyasi Axborot xizmati