Surxondaryo viloyati Ichki ishlar boshqarmasi rahbariyati tomonidan Termiz shahrida tungi faoliyat, kuz-qish mavsumiga tayyorgarlik jarayonlari oʻrganildi
2025-11-08 09:00:00 / Yangiliklar
Tadbir Prezidentimizning 2025-yil 3-yanvardagi PQ–1-son qarorlari ijrosini taʼminlash, jinoyat va huquqbuzarliklarni oldini olish hamda aholi osoyishtaligini mustahkamlashga qaratildi.
Dastlab, viloyat IIB boshligʻining birinchi oʻrinbosari podpolkovnik Akmal Muratov “Saxovat” mahallasidagi huquq tartibot maskani faoliyati bilan tanishdi.
Ushbu mahallada fuqarolar xavfsizligini taʼminlash, jinoyatchilikning oldini olish va profilaktik tadbirlarni samarali tashkil etish ishlari koʻzdan kechirildi.
Tungi xizmatga jalb etilgan xodimlar va jamoatchilik vakillari bilan suhbatda “ijtimoiy profilaktik” tadbirlarni manzilli tashkil etish boʻyicha topshiriqlar berildi.
Shuningdek, “Alpomish” mahallasida joylashgan “24/7” turistik va gastronomik koʻchasida fuqarolar xavfsizligini taʼminlash boʻyicha amalga oshirilayotgan ishlar oʻrganildi.
Masʼullarga yoʻl harakati xavfsizligini kuchaytirish, aholi koʻp toʻplanadigan joylarni kameralashtirish va kiberjinoyatchilikning oldini olish yuzasidan koʻrsatmalar berildi.
Oʻrganish davomida Prezidentimizning PQ–1-sonli qarori ijrosi hamda “Kibermadaniyatni yuksaltirish” oyligi doirasida mahalla yettiligi bilan hamkorlikda amalga oshiriladigan ishlar boʻyicha tavsiyalar berildi.
Shundan soʻng, “Oʻzbekiston” mahallasida joylashgan “Surxondaryo viloyat issiqlik taʼminoti” MCHJning RK–6 markaziy qozonxonasi faoliyati bilan tanishildi. Zamonaviy “aqlli” texnologiyalar asosida faoliyat yurituvchi ushbu tizim koʻp qavatli uylar va ijtimoiy obyektlarni issiq suv bilan taʼminlab kelmoqda.
Shuningdek, “Tuproqqoʻrgʻon” mahallasidagi maxsus qabulxonada saqlanayotgan shaxslar uchun yaratilgan sharoitlar hamda xodimlarning tungi xizmat faoliyati oʻrganildi.
Oʻrganish yakunida aniqlangan kamchiliklarni bartaraf etish boʻyicha viloyat va shahar IIB masʼullariga tegishli koʻrsatmalar berildi.
Hozirda viloyatning barcha hududlarida aholi osoyishtaligini taʼminlash va jinoyatchilikning oldini olishga qaratilgan tungi faoliyat ishlari izchil davom ettirilmoqda.
Surxondaryo viloyati IIB Axborot xizmati