Buxoro viloyati Gʻijduvon tumanida aholi murojaatlarini hal etish boʻyicha sayyor qabul oʻtkazildi
2025-11-07 12:00:00 / Yangiliklar
Qabulda Gʻijduvon tumani aholisi, shuningdek, viloyatning boshqa hududlaridan kelgan 50 nafarga yaqin fuqaro ishtirok etdi. Fuqarolar oʻz murojaatlari orqali viloyat rahbariga turli sohalardagi muammolarini yetkazishdi.
Tadbirda viloyat hokimining oʻrinbosarlari, tegishli soha va tashkilot rahbarlari, shuningdek, huquqni muhofaza qiluvchi idoralar, jumladan, Buxoro viloyati Ichki ishlar boshqarmasi boshligʻi ham ishtirok etdi.
Sayyor qabul davomida, Ichki ishlar boshqarmasi boshligʻi tomonidan 10 ga yaqin murojaat oʻrganildi. Murojaatlar asosan tergovga qadar tekshiruv, dastlabki tergov va surishtiruv jarayonlari, ish haqi undirilishi, shuningdek, transport vositalaridan taqiqni yechish masalalariga oid boʻldi.
Har bir murojaat boʻyicha fuqarolarga qonunchilik talablari asosida tushuntirishlar berildi, ayrim masalalar joyida hal etildi, qoʻshimcha oʻrganish talab etiladiganlari boʻyicha esa mutasaddilarga tegishli topshiriqlar berildi.
Hal etilishi uchun maʼlum muddat talab etiladigan murojaatlar ijrosi yuzasidan masʼul tashkilot rahbarlariga aniq vazifalar yuklatilib, ularning bajarilishi qatʼiy nazoratga olindi.
Buxoro viloyati IIB Axborot xizmati