Har qanday demokratik jamiyatda davlat fuqarolar oldida hisobdor boʻlishi, uning faoliyati oshkora boʻlishi va qabul qilinayotgan qarorlar jamoatchilik uchun tushunarli hamda ochiq boʻlishi talab etiladi. Bu jarayon fuqarolarning davlatga boʻlgan ishonchini mustahkamlaydi, korrupsiya xavfini kamaytiradi va boshqaruv samaradorligini oshirishga xizmat qiladi.

Adliya vazirligi ushbu masʼuliyatni toʻliq anglagan holda, oltinchi yildirki, jurnalistlar, blogerlar hamda jamoatchilik vakillari bilan ochiq muloqot formatida uchrashuv oʻtkazib kelmoqda.

Bugun, 27-mart kuni Adliya vazirligida jamoatchilik ishtirokida navbatdagi yillik sarhisob tadbiri oʻtkazildi.  Unda dastlab, vazirlik tomonidan  2024-yilda amalga oshirilgan ishlar, taqdimoti oʻtkazilgan va bugungi kunda amaliyotga tatbiq etilgan loyihalar toʻgʻrisida OAVlari va jamoatchilik faollariga hisobot berildi.

Xususan, 2024-yil 24-mayda “Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida”gi PF–80-sonli Prezident farmoni qabul qilinishi natijasida, adliya organlari aholining tizimli huquqiy muammolarini oʻrganib, ularni hal etishda asosiy koʻmakchiga aylandi.

Huquq ijodkorligi. Vazirlikning asosiy vazifalaridan biri boʻlgan huquq ijodkorligi sohasida yagona davlat siyosatini yuritish boʻyicha quyidagilar amalga oshirildi.

Tashabbus bilan 286 ta normativ-huquqiy hujjat loyihalari ishlab chiqildi.

2 093 ta loyiha huquqiy ekspertizadan oʻtkazilib, 1 731 tasi yoki 83 foiziga ijobiy xulosa berildi, 362 tasi yoki 17 foizi konseptual eʼtirozlar boʻlganligi sababli qaytarildi.

Ekspertizadan oʻtkazilgan loyihaning 222 tasida (11 %) korrupsiyaviy omillar aniqlandi.

Huquqiy axborotni yetkazish. 2024-yilda 637 mingdan ortiq targʻibot tadbirlari oʻtkazildi.

“Madad” ijtimoiy-huquqiy loyihasi doirasida denovlik nogironligi bor ayol Dilorom Yoʻldoshevaning oddiy hunarmanddan tadbirkorga aylanishiga koʻmaklashildi.

D.Yoʻldoshevaning matonati yuksak eʼtirof etilib, BBC ning 2024 yilda dunyoning ilhomlantiruvchi 100 ayoli roʻyxatiga kiritildi, Prezident Farmoniga asosan “Mardlik” ordeni bilan mukofotlandi.

Ushbu jarayonlarni yorituvchi “Matonat” filmi “Oltin humo” mukofoti bilan taqdirlandi.

Raqamlashtirish yoʻnalishida. Adliya vazirligining asosiy 208 ta funksiyasidan 106 tasi yaʼni 51 foizi raqamlashtirishga erishildi. Natijada birgina qogʻoz sarfi kamayib, 9 mlrd. soʻmdan ortiq mablagʻ iqtisod qilindi.

Vazirlik tashabbusi bilan sunʼiy intellekt yordamida huquqiy masalalarga javob topishga koʻmaklashadigan yagona platforma
“Lex AI” ishga tushirildi.

Huquqni qoʻllash va inson huquqlarini taʼminlash.

2024-yil kelib tushgan 190 ming murojaatlarning 130 mingtasi qanoatlantirildi, 39 mingtasiga tushuntirish berildi, qolganlari tegishliligi boʻyicha vakolatli organlarga yuborildi.

5385 ta davlat organlari va tashkilotlari hamda ularning hududiy boʻlinmalari faoliyati oʻrganildi.

Aniqlangan qonunbuzilishini bartaraf etish boʻyicha 7 300 ta taqdimnomalar kiritilib, 150 mingdan ortiq jismoniy va yuridik shaxslar huquqlari tiklandi.

Fuqarolarning huquqiy muammolarini aniqlash va hal etishga qaratilgan “Adliya-mahalla.uz” axborot tizimi ishga tushirilib, qariyb 1,7 mln. xonadonlarda 200 mingdan ortiq  huquqiy muammo aniqlandi va ularning 87 % hal etildi.

Davlat xizmatlarini koʻrsatish. 2024-yil davomida “Hammasi bir joyda” tamoyilini hayotga tatbiq etish boʻyicha ishlar davom ettirilib, davlat xizmatlari markazlarida koʻrsatiladigan davlat xizmatlari turlari soni 408 taga yetkazildi (hozirda davlat xizmatlar soni 437 yetdi).

Respublika boʻyicha 188 ta mahallaga davlat xizmati koʻrsatishga moʻljallangan maxsus interaktiv kiosklar oʻrnatildi.

DXMlarda Face-ID tizimi orqali shaxsni identifikatsiyalash tizimi yoʻlga qoʻyildi. Natijada ariza beruvchilarga shaxsni tasdiqlovchi hujjatlarsiz ham davlat xizmatini koʻrsatish imkoniyati yaratildi.

2024 yilda davlat xizmatlari markazlari orqali 12,3 mln.ta xizmat koʻrsatildi. Bu 2023 yilga nisbatan 40 foizga koʻp.

11 ta davlat xizmatlarini kompozit va proaktiv shaklda koʻrsatish yoʻlga qoʻyildi.

Intellektual mulk sohasi. Oʻzbekiston, intellektual mulk sohasida amalga oshirilgan islohotlar natijasida, 24 yildan soʻng 2024-yilda AQSH Savdo vakilligining “301-maxsus hisoboti”da investitsion jozibadorlikka salbiy taʼsir koʻrsatib kelayotgan “Kuzatuvdagi davlatlar” roʻyxatidan (qora roʻyxatdan) chiqarildi.

Matbuot anjumanining ikkinchi qismida, jurnalist, bloger va jamoatchilik vakillari oʻzlarini qiziqtirgan savollarga  bevosita soha mutaxassislaridan javob olishdi.